Wednesday, July 18, 2007

من وحى أفلام حسن الامام....زيارة متكررتش من عشرين سنة

يا ترى اية احساسك لما تروح تشوف حد بقالك عشرين سنة مشفتوش؟
ايوة عشرين سنة لما كنت لسة 8سنين وانت لسة فى مرحلة تبديل أسنانك اللبنية..ههههههههههههههه...أكيد مشاعر مختلطة وقلبك بيضرب درامز...دة كان احساسى يوم الخميس اللى فات
مفاوضات تجرى على قدم وساق بقالها يومين بين اتنين من أعزاء لدودين والعبدة لله علشان اروح ازور سيادته بما أن ليا فعلا عشرين سنة مازورتوش
أحد اللدودين اتصل بيا وقبض عليا وكلبشنى (أصله اصلا مش بيسلم على ستات)واللدود التانى اكتفى يتمم عليا بالموبايل....اللدود الأول كارلوس..أيوة اسمه كدة عالمسنجر...وبيفكرنى بالارهابى الدولى الشهير اللى حمل الاسم نفسه
وروحنا على ميدان السيدة زينب...الميدان كان آول وآخر مرة شفته عالطاير كانت مظاهرة كفاية بتاعت ارتفاع الأسعار... ومش فاكرة كانت امتا...صديقى اللدود قاللى ..ها نفسك فى اية؟؟...قلت له يعنى اية؟؟ انت خلاص نويت تنفذ فيا حكم الاعدام؟؟..لاااا أنا أروح بيتنا أحسن قبل ما نروح عند الآخ دة اللى مستنينا..بما أنك سمعتى الكلام...ليكى مكافأة..كل طلباتك أوامر...شبيك لبيك
هواقترح كنافة سخنة وسوبيا من الرحمانى....انا قلت له لب... اللب حبيبى ووالديا...لأنى ماليش فى الحلو أوىوبما أن كارلوس وارهابى...صمم على سوبيا...وأنا أول مرة أجرب السوبيا دى...وشكلها جابلى أرتيكاريا...شبة الشاور جيل...قلت أشوف يلااا....كدة كدة خربانة...السوبيا لاقيت انها معسلة وحلوة أوى...يـــع الله يقرفك يا كارلوس ويتصرف فيك انت واللى فى بالي...فابدلنا الكوبايات وادانى سوبيا مززة..ممممممممم فعلا مززة..مش مزّة بس علشان فيه حاجات بتتفهم غلط...يعنى طعمها زى الحرنكش أو الجريب فروت...وعليها قرفة
ضربنا السوبيا...وأنا بأحكى لصديقى ان مفيش فرق بينها وبين البوظة..بما أنه اد ولادى اللى كنت حأخلفهم لو كنت اتجوزت ابن الجيران زمااااانقاللى انه ميعرفش طعم البوظة....اضطريت أوصف له أنى جربتها زمان لما كان بتاع البوظة تقريبا صعيدى جاى لسه بشوكه .....شايل جركن بلاستيك عامل له غطا مخصوص من الألمونيوم....ينادى على عيال الحارة أمثالى..وأمى عاملة حظر تجول جنب باب الشقة وتقنع فيا من خلال ايد المقشة أن البوظة دى حاجة يععععع وحشة..والراجل عاملها بالعيش المعفن البايظ....وأن فيه ديناصورات ممكن تنمو فى معدتى...طبعا وأنا لا حياة فيمن تنادى...وهووب افلت من ايدها على بلكونة الشقة...وهووب تانية فى بلكونة سطح الجيران اللى لازقين جنبنا لحد دلوقتى....وأنزل من عندهم على الشارع وأشرب البوظة المعمولة من العيش المعفن
اتجولنا فى الميدان...هوب صديقى اللى عامل فيها جايد اتلخبط وتاه شوية...وفين لما لقط تانى خيط التووور اللى واجع راسى من يومين نعمله فى ميدان السيدة...لفينا حوالين الجامع..ومرينا عالسيبل...وفضلنا نسمّع لبعض أم العواجز ليحيي حقي...وفضلنا نتخانق على تحديد الأماكن اللى وردت فى القصة..واتمشينا فى السوق الصغير اللى ادام المحلات....وعلقت ان ريحة السوق فكرتنى بسوق بغداد...شارع المنصور...وصديكى اللدود يقوللى..بطلى حكاية مناخيرك اللى فضحتنا فى كل حتة دى
واخيرا روحنا عند صاحبنا اللى مزورتوش من زمااان قوى....ههههههههههه اة مزرتوش من ايام ما كنت بأبدل اسنانى الأولانية...(ومش حأقول عندى كام سنة علشان مكتوب فى بروفايل البلؤ).....وأنا أد البنت اللى فى الصورة دى
أنا شفته ضربت لخمة... وهو بيكلمنى وانا أهز فى راسى ومفيش صوت طالع
وصديكى اللدود كارلوس برضة من كم التي شيرت ويقوللى تقدمى للأمام وواقف أدام الأوضة وخايف لأهربب
ما أنى يوم بطوله حاولت أقنعه بالتأجيل...لكن على مين؟؟؟
وقعدنى عالكرسى وبيدينى التعليمات
أول أمر...ممكن تقلعى!!؟؟نعم!!!!أقلع اية؟؟؟
أيوة تقلعى الكاب لو سمحتى علشان اعرف اشوف بقك
أة...اصله دكتور أسنان حضرتك وذكرياتى معاه مرتبطة بحاجات مأساوية زى أفلام حسن الامام
تانى حاجة...انتى بتشتكى من اية؟؟قلت له كل حاجة..التهابات اللثة وضرس العقل اللى له سنة بيطلع...ومطلع عينى معاه
طلّع العدّة...شنيور...جفت وقطن وجلفز وجلفز تانى
أصله دكتور موسوس ومرضيش يمسك القطن مع انه لابس تو جليفز ان هيز هاند...وهاتك يا حفر
وأنا بأحاول أبقا عاقلة وهادية ويا بت يا زنزانة..ولا يهمك علقة تفوت ولا حد يحوش
وفى سرى بأقول الله يسامحكم انتوا الاتنين ياللى عملتوا عليا المؤامرة دى...الأولانى واقف حرس جنبى أحسن أجرى...والتانى بيتابع تطورات الحدث بالتلافون...طب والله لأوريكم بعدين
والشنيور شغال...وأنا قلبى واقع تحت الكرسى ومستسلمة...وبعد عشر دقايق من لف الدكتور حواليا وقلبى اللى اتخلع مع كل ضربة معول فى جدار اللثة ..قال..خلاااااص وأخدت نفس عميق وقلت أهى مرة وعدت....بس على مين؟؟ لقيته بيتفق مع صديكى وأنا مسلوبة الارادة بأنى هآجى تانى وتالت ورابع أكمل العمرة....وأانا قلت له مش هو كدة خلاص؟؟؟الدكتور ادانى بصة ازدراء واستهجان وقاللى...نعم؟؟؟ لا سيادتك حتشرفى كمان يومين وحتمشى عالعلاج أنا كان نفسى أصرخ كفاية حراااااااااااااااام
أما العلاج فكان ماء أكسجين...ومحلول تانى مأعرفش اسمه افتكرته صبغة يود
بس ألحق أخد الدوا...أحسن فيها ضرب وخناق..وبما أنى عارفة أنى هنضرب وأسكت فبلاها سوسو
وش بيغمز واخد فى سنانه
استنوا الحلقة التانية

19 comments:

Anonymous said...

ا بختك يا زنزانه كالورس الارهابي اخدك عند دكتور الاسنان واكلك سوبيا انااعرف واحدة قريبة منه المفروض جدا لا تجد سي كالورس هذا عندما تذهب الي طبيب الاسنان او اي طبيب اخر لان سيادته مش فاضي علي العموم شفاك الله وعفاك وانا كمان بروح لدكتور الاسنان وكلنا في الهوي سوا علي فكرة الم يقل لك ان المدرسة التي امام محل سربيا الرحماني هيه مدرستي الثانوية والله انا اللي اخدته وعلمته اكل السوبيا

zenzana said...

البتول
قالي طبعاانك انتي اللي علمتيه يروح الرحماني، وحكي لي عن مدرستك، ومش بيبطل كلام عنك
وخلاني نفسي اشوفك جداااااااا
بجد والله

Anonymous said...

وجعتيلى سنانى وانا باقرا معاكى
فكرتينى بالذى مضى

تقريبا نفس الحادثة
بس أختك هربت من عالكرسى قبل ما المشرط والشنيور يشتغلوا

يعععععع وربنا جسمى قشعر تانى لما افتكرت
الله لا يرجعها أيام


انا واحدة من الناس يا بنتى
بأتمنى ان مدة الغياب بينى وبين الدينتيست تبقا قرون وقرون
حتى لو انا مت وروحت الجنة ولقيته هناك


حاسيبهاله مخضرة وأمشى


جهنم تبقا أرحم

نياااهاااهااا


وسنانك سيادتك عاملة اية دلوقتى؟؟
أخدتى مقاس الطقم ولا لسة؟؟؟

Anonymous said...

يخرب بيت كدة

الفونت كان مقاسه حلو يا بنتى
اية الكنافة الشعر اللى انتى عملتيها دى؟؟؟؟؟

دى ملامحه اتطربقت خااااالص

عودى يا راندا لقواعدك سالمة والفونت الأولانى كان حلو ومقاسه كويس جداااا

Bella said...

ههههههههههه

يخرب عقلك
فكرتيني بذكريات مؤلمة
وطعم القرنفل اللى الدكتور بيحطه مع المعاجين والحاجات الغريبة اللى بيقعد يخلطها على بعض

واشي حشو مؤقت

واشي حشو دائم

ومش ح احكيلك اكتر من كده علشان تكملي الزيارات الباقية لك
ههههههههههه

بس انا بقى ياستي باروح لدكتور الاسنان وانا بكامل قواي العقلية وبإرادتي الحرة الابية وبدون حد ماييجي معايا كمان

عمرك شفتي حد بيفتري على نفسه بالشكل ده
ههههههههه

منتظرين التكملة

اسكندراني اوي said...

هههههههههههههههههه
حلوه المرجيحه دي
اقصد الزياره لدكتور السنان
على فكره
انا كمان بقالي 20 سنه ما رحتلوش ومش حقول عندي كام سنه
هههههههههههههههههههه

الف سلامه

ملحوسه:
الكتابه كده كويسه البوست اتظبط
متشكرين يا شهروزه انك رجعتيها لعقلها

Anonymous said...

zenzana
i missed you so much. since long time i did not comment. i'm so sorry for you wisdom tooth. but what ever you still beauty and lovely.specially your tricky smail.
reg.

Xee said...

هههههههههههه

الف سلامة يا فندم ، دكتور الاسنان ده اكتر حاجة خنقة في التاريخ، بحيي شجاعتك و صبرك انك رحتي الصراحة

:)

و من الواضح ان شغل الدكتور جايب معاكي نتايج هايله، و التظبيط نازل على ودنه، ولا ايه يا عم المجهول

تحياتي

Gid-Do - جدو said...

راندا

عشنا وشفنا
يامفتريةـ يامبذرة ـ حد يروح لدكتور الاسنان كل عشرين سنة ـ لية بتلاقى الفلوس فى الشارع ؟

Anonymous said...

هل الرب الإله ذكر؟؟؟


هل قدم احدهم الاثبات على ذكورة الله


أم هو أسقاط السلطة الذكورية على مفردات الأسطورة

مشروع انسان said...

يدعوكم موقع مدون خانه (تحت الانشاء)الى الاجتماع من اجل الاتفاق على الخطوات النهائيه لنشاء مجمع المدونين (مدون خانه)وذلك يوم السبت القادم الموافق 28 / 7 / 2007 وذلك الساعه 6 مساء يوم السبت فى مركز العربى للدرسات العنوان 23 شارع باهر زغلول من شارع المنيل

zenzana said...

شهروزة
ههههههههههههههههههههه
مش عارفة ارد عليكي كل ما اقرا التعليق اقع من ع الكرسي
طقم؟ طيب يا ولية والله لاوريكي
هعضك

دلوقتي بقت تمام خالص استني الحلقة الجاية

zenzana said...

شهروزة تانى

كان خطأ مطبعي تسلم ايدك
صفايح الزبدة السايحة اللي عدلت الفونت
ربنا يخليلك كل فونتاتك من غير لعبكة

zenzana said...

bella

دا انتى جبارة حد يروح للتهلكة برجليه؟

انا يا ختي لازم حد يحايلني ويضحك علي عقلي بكلمتين من عينة هجيبلك شيكولاتة، او هجيبلك حتي فيل بمبي عشان اروح وطبعا بما انى بصدق بسرعة بروح علي طول
كملت يا فندم وخلصت جلسات امبارح
لولولىىىىىىىىىىى

zenzana said...

اسكندراني اوي

ههههههههه دا احنا طلعنا مشتركين اهو مع بعض ف حاجات مهببة

مش مستنية تقول عمرك اد ايه، اوعي تفتكر اني بظبط ، ع العموم العمر مش بيتحسب بالسنين
بيتحسب بس بمقدار السعادة اللي حصلت عليها او مدي انجازاتك لاحلامك هههههههه

وبكدا هتلاقيني عندي 3 سنين واحلام كتيييييييررر

zenzana said...

زيزو

منور يا فندم

اخبار الناموس ايه؟

يا ساتر عليك ما تسيب المجاهيل ف حالهم وبلاش تقطيع ارزاق

(وش بيغمز)
:)))

zenzana said...

جدو حبيبي

لا انت فهمت غلط
اللي اتورط وضحك علي عقلي ووداني هو اللي هيدفع
هههههههههههههههه

zenzana said...

حنين

بالنسبة لي

مش مهم هو ذكر ولا أنثي مش فارقة معايا
اللي عايز يعبده مش هيهمه النوع

zenzana said...

أمام الجيل
علم يا فندم
وشكرا