Monday, November 26, 2007

ثاني حلقات الاعترافات .... اعترافات ف عز الضهر

الحلقة ده من الاعترافات هي حلقة برده سبق نشرها علي مدونة المتمرجحة الكبيرة زنزانة وبالحلقة ده تكون كل الاعترافات القديمة والي سبق نشرها خلصت لنبدأ من بكره نشر الاعترافات الجديدة
تابعونااااااااااااااااااااااااااااا



علي نسق اعترافات شهروزة حبيبتشي، حاولت اعترف بحبة حركات ومقالب وبلاوي ارتكبتها فافتكرت جزء، هقول منه حاجات، وهحتفظ بحاجات مش هقولها ، ولاقيت كمان ان بعض بلاويا اختفي تماما بالظبط زي المكسرات لما تغوص في الشيكولاتة ومتبانش!!

أنا اللي دبرت مقلب الازازة اللي ريحتها وحشة ف شنطة يد أبلة سلوي، لانها حلفت تسقطني في امتحان الشهر،في تانية ابتدائي، لاني فضحت بنت اختها اللي كانت عاوزة تغش مني ف الامتحان، ولزق المقلب في الواد الجتة "عماد"، فتوة الفصل ، انا حطيت الازازة ف شنطتها وفي الفسحة روحت ل "عماد" وقلت له ان ابلة سلوي اديتني شيكولاتة من شنطتها، زي العبيط راح عند شنطة الابلة، وفتحها ، لاقي الازازة فتحها، وانا زقيت دراعه وخلعت، كانت الازازة وقعت جوا الشنطة وعملت الريحة المقرفة دي، وخد حتة دين علقة، يستاهل ما هو كمان قبلها بيومين وقعني في الفسحة علي الارض، وركبي الاتنين اتعوروا، قال ايه مش عاوز بنات تلعب معاهم كرة.

أنا اللي ضحكت علي المسكين اخويا عشان يكسر الاطباق الازاز ، أمي كانت بتحبهم جدا لانهم كانوا هدية من ابويا لما كان مسافر ليبيا، انا شوفت امي بتحطهم علي النار ومش بيحصل لهم حاجة، قلت طالما النار مش عملت حاجة يبقي رزعهم ع الارض مش هيأثر، وتفاديا للضرب لو اتكسروا قلت استخدم المسكين اللي ما صدق ما لقي حاجة يلعب بيها، وكل ما يكسر طبق، اقنعه انه يمكن الباقيين ميتكسروش، وهاتك يا دشدشة.

أنا اللي حرضت المسكين الغلبان برده أخويا انه يحط الميه ف قلب التليفزيون، كنت عاوزة اعرف ايه اللي هيحصل لما احط الميه، كنت فاكرة ان الناس اللي جواه هيطلعوا برا، طبعا انفجر، واخويا اتكهرب وكمان أخد العلقة .

أنا اللي قصيت فستان فرح مامتي حبيبتي، كنت عاوزة اشوف عندي مواهب ف الخياطة زي تيتا ولا لاء؟ وكمان كنت عاوزة اقصره عشان يبقي علي أدي، لبست العملة ف بنت خالتي، اللي هي في نفس سن امي، ساعات كانت بتيجي لتيتا ،وتقيس فساتين أمي من وراها، وعليه اخترت يوم تكون هي جاية، وكشفت انا العملة ،خصوصا انها كانت معجبة بالفستان، ونفسها تاخدوا، طبعا امي كانت بتقول بعين اللي خلفوها . دا اول اعتراف بالعملة من عشرين سنة .

- أنا اللي كنت بقلد مسرحية "ريا وسكينة" و بحط كل مرة الملح علي السكر، في فنجان القهوة، بتاع ابن خالة امي ،أونكل عبد الراضي ،و بعدها معدته تقلب ، ويفضل رايح جاي من والي التواليت، كل مرة يجي فيها م الصعيد، لانه دايما كان يدي اخويا عيدية اكتر مني قال ايه عشان هو الولد، وكمان بيحرض امي ان بقيت طولها، وميصحش العب ف الشارع، مع ان كان عندي سبع سنين، وكل مرة بعد ما يمشي اتحبس واخد علقة لو حبيت العب ف الشارع.

- أنا اللي بعت هدية لاستاذ الفيزياء ف أولي ثانوي، عبارة عن ببرونة أطفال، وجواها ورقة بتقول "علي أد سنك"، طبعا الورقة مكنتش بخطي انا، كانت بخط اغلس بنت ف الفصل، وكانت حدفتني بالورقة ف الحصة، كنت مزقططة جدا وغلست عليها ، لما جه الاستاذ تاني يوم وهزئها قدام الفصل كله علي عملتها الهباب.

أنا اللي كنت السبب في حرق شعر بنت خالتي في فرح أختي، من تسع سنين، كنت انا وعبير صحبة اختي ماسكين الشمع، اتكعبلت مش عارفة ف ايه؟ (وش بيغمز) ، شمعتي جات علي ايد عبير اللي شمعتها مالت علي راس بنت خالتي ، فاتحرق شعرها، بعدها الاتنين اتخانقوا وقاطعوا بعض، بصراحة بنت خالتي تستاهل، كانت بتتنك وبتتمنظر بدون داعي.

- أنا اللي ناديت علي أبلة وفاء مدرسة التاريخ في تالتة ثانوي، عشان تشوف سمية صحبتي ورا باب الفصل كانت بتعمل حواجب بنت صحبتها بالخيط، اتحولوا لمكتب الست الناظرة، اللهم ما احفظنا،
تستاهلي يا سمية ، حاولت كتير اقولها بلاش ف الفصل ممكن التواليت.


أنا اللي دمرت عشرين شريط كاسيت بصوت أم كلثوم ، لبابا أول ما رجع م السفر، لان وقتها مكنتش بحبها خالص، وهو واجع دماغي باغانيها الطويلة علي مدار 24 ساعة، فسجلت عليهم حلقات مسلسل " الشهد والدموع " و "ماكجيفر" ، وجزء منهم كنت بقلب البكرتين عكس بعض، وأول ما هو يحط الشريط في الكاسيت يتشد ويتقطع ، لزقت في أختي لانها الوحيدة اللي عبرت له عن عدم حبها للست ام كلثوم، وأمنيتها انه يرحمها م الشرايط دي.


اعترف اني انا اللي فيرست اللاب توب بتاعه مش صديقته الانتيخ ، كل مرة كنت اروح أسافر أقضي اجازة هناك، كانت بتحب تيجي البيت من باب الغلاسة، وف المرة دي اتصلت عاوزة تيجي عشان تستعمل الانترنت، وكمان كانت عاوزة تستعمل اللاب توب بتاعه، مش الكمبيوتر العادي لانه بطيء، أنا كمان اتصلت بصديقي الانتيخ، انه يبعت لي لنك لاي فيروس، وفعلا اول ما هي جات تستعمل الجهاز كان الفيروس انتشر، وشل الجهاز ، ودي كانت أخر مرة أشوف خلقتها ف البيت، خصوصا ان الجهاز خد كام يوم لحد ما اتصلح، تستاهل لانها عارفة أني مش كنت بحب استعمل اللاب توب احتراما لخصوصية حاجاته كمان كنا رايحين السنيما .

اعترف كمان أني أنا اللي دبرت وخططت لكسر سي دي بتاع لعبة "الحضارة"، مش بحب الجيمز، وكنت بتغاظ لما كان قاعد قدامي بيكلمني وماسك اللاب توب وهاتك يا لعب، وفشلت محاولات اقناعي باني اتعلم اللعبة، ونلعبها سوا، ولاني درست خطواته كويس في البيت، حطيت السي دي جنب رجل ترابيزة المطبخ، وهو زي كل مرة، جه حرك الترابيزة جامد، ورفعها، وحط اللاب توب عشان يلعب ، وهوب السي دي لوحده كان تحت رجل الترابيزة، وديشششششش، لزقتها فيه هو لانه دايما كان سايب حاجاته مبعترة ف الشقة من غير نظام..

أخر حاجة لسه طازة امبارح بس، حطيت رجلي قدامه وهو بيعدي، وقع اتكوم وهو نازل من عربية المترو، غلس عليا، وغتت، وكمان البادي سبراي بتاعه كان يقرف، كبرت دماغي اني ازعق له، قلت الطيب أحسن، اللهم لا شماته

Saturday, November 24, 2007

الحلقة الاولي من الاعترفات .... اعترافات ليلية


بما ان هذه الحلقة من الاعترافات قد نشرت قبل ذلك في مدونة شهروزه
الا اننا راينا اعادة النشر لسببين
الاول ان مراجيح تبقي مكان يلم كل الاعترافات المنشور منها والجديد
والسبب التاني الاعترافات ده ليها جزء تاني مش هينفع يتقري الا لما تقرا دول الاول
وعلي فكره احنا بنرحب باي اعترافات لاي حد من اي حتة ننشرها له
وكله في سبيل عموم فائدة الاعترافات
أبعت لنا اعترافاتك علي
ahmedikhwan@gmail.com
أسيبكم مع بلاوي المتمرجح الاول... شهروزة



أقر وأعترف
بأنى كائن كئيب محب للعزلة ولا أهوى التجمعات البشرية الكبيرة ، حيث تشعرنى بالعدائية بداخلى نحو أى حد يفقد عقله ويحك لى فى مناخيري
....................................
أقر وأعترف أنى مخلوق قابل للتعلم كل يوم ، وبأى وسيلة ، ومن اى حد أقتنع بوجهة نظره وأنى مخلوق ذو طبيعة واحدة ، يا أما أبيض أو أسود ، مفيش كاروهات ولا حسب الظروف
.....................................
أقر وأعترف أنى فى مواقف بايخة راسى بتبقا أنشف من أقدم فردة شوز على وجة البسيطة...ومحدش يسألنى اية هى المواقف دى
......................................
أقر وأعترف أنى عصبية و غلسة وسئيلة وخنيّقة فى أغلب الأوقات ومحدش بيستحملنى والحمد لله ، لكن كله من باب الواجب
......................................
أقر وأعترف أن الرخامة والغلاسة على الناس طبع أسود ومهبب فيا ومش قادرة اتخلى عنه خصوصا على المقربين منى جدا...مالوش علاج عند حد الطبع المهبب دة؟؟
......................................
أقر وأعترف أنى أنا اللى حرقت طرف بلوزة ماما من عشرين سنة وأنا بألعب بشعلة البوتوجاز ودبستها فى أخويا الصغير وهو اللى أخد العلقة بدالى
....................................
أقر وأعترف انى أنا اللى كسرت ازازة الكولونيا بتاعت بابا اللى بيرش منها بعد ما بيحلق اللى ريحتها كانت بتخنق ماى ماذر لما تهفهف فى البيت من عشرين سنة ...ولزقتها برضة فى أخويا الصغير وهو اللى أكل العلقة بدالى
...................................
أقر وأعترف أنى انا اللى كنت بأكتب الواجب لأخويا وهو فى المدرسة وهو يخرج ويصيع براحته لما كبرنا شوية تعويضا منى على العلقات اللى اتسحلها بدالى...وطبعا مازال هذا السر مدفون للحظة قرائته الآن
........................................
أقر وأعترف انى ولا مرة عجبنى طبيخ ماما ، رغم روعته ، أد ما عجبنى أكل جدتى اللى هى والدتها...لكن طبعا مقدرش اقول كدة
.......................................
أقر وأعترف أنى أنا اللى دشدشت شاشة التليفزيون بمفتاح الأنبوبة وأنا باهزر مع أخويا وتقلنا فى الهزار شويتين بما أنه كان لسة موصلش يبقا طول أكتافى...وكسرت رجل النيش اللى هو محطوط عليه علشان الحادثة تظهر قضاء وقدر
وطبعا رجل النيش المخوّخة بفعل فاعل هى اللى شالت الجريمة كلها
......................................
أقر و أعترف أنى أنا اللى دلقت شفشأ المية من البلكونة على عم محمد الله يرحمه بتاع الفول وهو معدى تحت بلكونتنا وأنا صغيرة أوى...كنت عاوزة الحمار بتاعه ينهق وهو مش راضى ينهق... فى اليوم دة بس لما نهق فهمت انه كان مزكوم
.....................................
أقر وأعترف أنى عمرى ما حبيت حد من عماتى أو أعمامى أو أولادهم... لأنهم شبهى فى الشكل...حاجة تخنق لو مشيت مع حد منهم الناس تقول أخويا او اختى...مفيش تغيير؟؟...وأعتقد أن الشعور متبادل....ولا انا اللى بيتهيأ لى؟؟
................................
أقر وأعترف أنى أنا اللى رميت شالية الورد البلدى من البلكونة على راس أم رضا جارتنا اللى أدامنا يوم ما زعقت لى وانا بأسقى الزرع فى البلكونة والشوالى مقورة من تحت ودلقت المية علي راسها...وبعدها بنص ساعة نزلت روحت امتحان الرياضيات بتاع تالتة اعدادى بعد ما ثبتت التهمة على القطة اللى معدية من على سور البلكونة...حد كان قالها تبلط تحت البلكونة وقت ما بأسقى الزرع وهى عارفة أن دة الوقت بتاع الزرع الصبح بدرى ؟؟...أمتثثثثثثم...حكم
...................................
أقر وأعترف أنى حطيت ملح وجبنة بيضا فى فنجان الشاى وأنا بأقدمه لخالى لما جة يزورنا...زعق لأخويا قبلها بيوم وضربه جوز أقلام... علشان قال اية؟؟؟؟
طير له جوزين حمام من الغيّة بتاعته بتلات آلاف جنية
افتكره شاى بلبن وزاح الفنجان مرة واحدة...وعينك ماتشوف الا النور...من يومها له تسعتاشر سنة مش بيبص فى وشى أنا وأخويا والحمد لله
................................
أقر وأعترف أنى رميت نص الخمسة كيلو سمك اللى بابا جابهم معاه من ايتاى البارود...وكدبت عليه وقلت له انه كان بايظ ومش طازة...المقص وجع لى ايدى فى التنضيف...قلت الرحمة حلوة وكفاية عليهم اتنين كيلو...رميت نص كيلو للقطط على باب البيت...والباقى...عمل بعثة لحد أم صابرين على أول الشارع وقلت لها أنه هدية من ماما
...................................

أقر واعترف انى أنا اللى كسرت رقبة الديك الرومى بتاع الفرارجى اللى على ناصية شارعنا...فى حالة دفاع شرعى عن النفس طبعاااااا
نط لى من فوق التقفيصة...وجرى ورايا تقولش بينى وبينه تار ولا أكلت حد من عيلته قبل كدة؟؟؟
ومحدش قدر يعكشه
دخلت أول شارع جانبى و بأول بلاطة كعبلتنى شيلتها وطاااخ فى وشه
فانكسرت رقبته قضاءا" وقدر وانتقل للرفيق الأعلى
لكن بعد ما ابن الهايشة قرمنى من سمّانة رجلى
وطبعا قلت ان البلاطة وقعت من العمارة اللى احنا تحتها...دة واجب عليا طبعا
هاااااة بقا... ذكريات الثالثة عشر ربيعا
......................................
أقر وأعترف أنى أنا اللى خليت شعر بنت عمتى الكبيرة ولا حريق القاهرة ايام الملك فاروق
ماهو انا مكنتش اعرف ان الازازة اللى ورا باب المطبخ فيها مية نار
افتكرتها خل... وأخدته ودلقته عالحنة
صوابعها بقت كفتة...وشعرها بقا...لك أن تتخيل... وقتها رميت البلوة على ابن ابن عمى البغل التانى...اة ابوة ابن عمى بحكم اننا اصغر اطفال فى العيلة وقتها ويعنى انا فى مقام عمته الأهبل دة...كنت بأكرهه عمى علشان كل ما يشوف فى ايدى شندوشت جبنة رومى من اللى بحبها ييجى يخطفه من ايدى ويفتحه يلهف الجبنة الرومى ويرمى لى العيش ويجرى يومها كان حلال عليه اللى حصل له
...............................
أقر وأعترف أنى أنا اللى سربت قطط جدتى الله يرحمها والدة بابا...كنت بأغير منهم أنها بتحبهم أوى...رغم انها كانت بتحبنى جدا جداااا علشان احنا اصغر احفادها...كانوا تلات قطط شيرازى عجب...بس اعمل اية؟؟...الغيرة وحشة بقا يا اخواتشى
اديتهم للعيال زمايلى فى الدرس وانا فى سنة سادسة ابتدائى حلوة وملو العين كدة
............................

أقر وأعترف أنى أنا اللى بلغت الشرطة فى استاذ على جارنا...سلم عليا فى الشارع وأنا راجعة من المدرسة والشنطة على ضهرى هدت حيلى بطريقة سخيفة زيه كدة...وهات يا احضان وطبطبات وانا مبحبش حد يقرب منى أو يحط طرف ايده عليا نوهاااااااائى
قااال اية؟؟ انا بنته التانية ...قال اية بيعدينى
المهم اديته اللى فيه النصيب وهددته انى حابلغ عنه الشرطة قعد يضحك شكمنى عيّلة صغيرة ومحدش حياخد على كلامى...مناخيرى نقحت عليا وجريت على القسم ومن عالباب هات يا عياط....يا شاويش راجل فى شارعنا كان حيخطفنى...ومسكنى وهات يا بوس وأحضان فيا وانا ماعرفوش بس هو ساكن فى اول الشارع...وعنها والشاويش الله يكرمه جة فى رجلى وشاورت له على استاذ على...ماعرفش جاب الأستاذية دى منين لكن باسمع كل الناس تقوله كدة...الوالد اعتذر للشاويش على الازعاج ومفيش حاجة واحنا جيران والذى منه....و مسك هو و اعمامى استاذ علي رقعه علقة متينة
من يومها لو شافنى معدية من يمين الشارع يدخل هو جرى فى الحيطة اللى فى يسار الشارع
................................

أقر وأعترف أنى كنت السبب فى اعتزال مدرس العلوم فى المدرسة الاعدادية لحياة التدريس واتجاهه الى التجارة فى الأدوات المنزلية... وقت ما كنت مسئولة عن الاذاعة المدرسية وتشغيل الطابور وفى يوم اشراف العلوم...مسك المايكروفون وهات يا تهديد ووعيد لكل من لن تلتزم بآداب اليوم بتاعهم...وشوشت صاحبتى اللى جنبى وقلت لها...المفروض اننا نكافح وجود الاستاذ فلان فى المدرسة بأن كل واحدة مننا تشيل مخرطة ملوخية فى جيبها...فى اللحظة دى كان بيدينى المايك أكمل تشغيل الطابور والاذاعة المدرسية
وعنها وأمة لا اله الا الله سمعتنى...حتسألوا اشمعنا مخرطة وهو اتحمق ليه والمدرسة باللى فيها سخسخت ضحك ليه
اصله كان اسمه الأستاذ فلان ملوخية
أنا كمان من يومها اعتزلت الحياة الاذاعية
يلا بقا...ربنا يسامحنى
..............................
أقر وأعترف انى انا اللى بوظت الملايات و الستاير البيضا بتاعت طنط اللى فوقينا وهى متنشرة فى البلكونة بحقنة مليانة ميكروكروم وجنتيانا زرقا...حكم بيتنا عقبال عندكم مبيخلاش من الحقن وادوية الكحة والأنفلونزا الخ الخ...وهات يا رش عالغسيل الأبيض
واحدة ناشرة ملايات سرير وستاير مغطية البلكونة بتاعتنا...تقولشى خشبة مسرح؟؟لا عارفة ابص عالناس فى الشارع ولا عارفة اتابع حركة سير المرور
لكن الحمد لله .... مبقتش تنشرهم بالطريقة دى تانى...بعد ما التهمة لبست فى الست اللى تحتينا...ودلوقتى أول اعتراف ليا بالحادث
................................

أقر و أعترف أنى كنت بأنط فى منور البيت وانا واخواتى لوحدنا فى البيت والباقى فى الشغل واحنا أطفال...وأطلع عالحيط والطوب الأحمر بارز منها...مجرد هواية...كان احساس حلو لما بأحس انى زى السحلية ماشية عالحيطة...وطقت فكرة مجنوة منيلة بستين نيلة فى راسى... رميت عود كبريت والع وانا تحت لمجرد اتفرج على الورق وهو بيولع ادامى...سقف المطبخ اللى تحتنا ولع...ولكن الحمد لله...لم يسفر الحادث عن وقوع ضحايا
اللهم الا قطتين كانوا نايمين ورا الكراكيب وانا مش شفتهم...و خراطيم المية اتفتحت من الشباك اللى فوقينا و أنقذت ما يمكن انقاذ
.................................
وسبحان الهادى من غير مناسبة...وقار ثانوية عامة بقا ومن وقتها...عقبال أولادكم
.................................
أمضى وأوقع ادناه
غادة شهروزة
ختم الشعار
قرص مدور وجواة حداية

Friday, November 23, 2007

مراجيح تعود ... والمرة ده انتظروا الفضاااااااااااااااائح


كتير سالني هي مراجيح متوقفة من فترة ليه وكنت دايما بحاول اهرب من السوال الي كانت اجابته معروفة للكل
الاجابة ببساطة ان المتمرجحون مكنوش بيتمرجحوا الفترة الي فاتت
كانوا واقفين عالارض مع العالم المكتئبة والمكشرة
طب والسوال هما رجعوا يمرجحوا تاني ؟
والاجابة اه ونص
المتمرجحون رجعوا للمرجحة من تاني والمرة ده اكثر
هيسالني واحد رخم وياتري ايه السبب
هرد عليه بمنتهي الثقة لان التجربة اثبتت ان التكشير ملوش لزمة
اه عندنا مشاكل
اه فينا الي مكفينا بس برده قررنا نتمرجح
راجع بياننا التاسيسي عشان تفهم كلامي اكتر
والمفاجاة ان المراجيح هتعود ليكم بمفاجاة كبيرة جدااااااااااااااااااا
هنعود باعترافات المتمرجحون انفسهم
اعترافات تنشر لاول مرة واخري نشرت من قبل
وربنا يستر
انتظرونا ......

Sunday, October 28, 2007

لو كنت روش طحن..يبقي أنت أكيد فيس بوكاوي


لو كنت روش طحن..يبقي أنت أكيد فيس بوكاوي
ولو معرفة الناس كنوز يبقي أنت في المغارة

زمان اللي هو مش بعيد قوي يعني، كان عشان تبقي روش طحن يبقي كان لازم تشيل موبيل، ومع التطور الطبيعي للحاجة الساقعة عشان تبقي روش طحن جدا يبقي لازم تبقي شايل البلوج بتاعك في جيبك، اما دلوقتي بعد التصاعد المستمر للتطور الطبيعي لكل حاجة،و عشان تبقي روش طحن جدا جدا يبقي لازم تبقي فيس بوكاوي، يعني تبقي من ضمن الكام مليون المشتركين علي الفيس بوك (المصنف الحالي كأكبر شبكة اجتماعية علي النت)، اللي اول ما يفتحوا الكمبيوتر، سواء ف البيت قبل غسيل وشهم، او في الشغل قبل ما يستعينوا ع الشقا بالله.
الموقع مش محتاج عبقرية نتوية ولا افتكاسات، لان الافتكاسات كلها موجودة، يعني مزيكا، رسم جرافيتي، هدايا، فيديوهات، نكت، وتهييس كمان، يعني ولا محتاج توجع قلبك وتصمم بلوج، وتدعي العبقرية الفذة في الكتابة والنضال، كل ما عليك، أن يكون عندك
Email address

وتعمل به Account

أو أن لو ليك اصحاب غتتين زي بعض اصحابي هتلاقي عشر تلاف دعوة جاية لك ومش هيسيبوك الا لما يطلعوا عين اهلك الا لما تقبل الدعوة وبعدها غصب عن عينك

هتبقي فيس بوكاوي، اسهل من شكة الكلاشينكوف ، ودا عالم واسع، بس متقلقش كله بكليك واحدة او كلكتين، ولو مش عاوز تتعب نفسك كل اللي يجيلك من اصحابك ابعته لهم تاني!! محدش واخد باله.
لو كنت من هواة التعرف ع المزز من الجنسين، مش محتاج لف ودوران، ولا تربيطات ع الشات، او حتي انك تظبط لك بلوج ، ولا الدخول في مباريات التعليقات والاخد والرد علي المدونات، لحد ما تتعرف، وبعدين تبقي صديق من خلال الايميلات، وبعدين ترتقي العلاقة وتقابل المزة علي أرض الواقع، وبعدها ربنا يسلك لك طريقك، لالالا كلا والف كلا ، أنت تدخل كمشترك محترم لك شنة ورنة، زي ابونا الحاج تمام ،واتفرج علي البومات الصور، ونقي واختار وقارن براحتك، محدش هيقولك تلت الخمسة كام، واي حد يخش الطاسة تعمله أدد في الليستة بتاعتك وعيش يا حاج /مان/مزة.


مش معني كدة أن الموقع خنقة، أو هايف والعياذ بالله، هو بس بعد شوية هتلاقي ان كل الحاجات اللي بتجيلك من اصحابك جات لك قبل كدا عشر تلاف مرة، أو كل الافتكاسات اللي انت بعتها لاصحابك هي هي اللي بتوصلك منهم، وان كل من هب ودب بيعملك ركوست عشان تبقي صديق ، بس برده هتقدر تلاقي اصحابك بتوع زمان، وتصرخ كدا وتقول ياااه مسير الحي يتسفلت، أصحابك اللي كانوا معاك في كي جي وان، واحتمال قبلها لما الست مامتك كانت بتابع حملها فيك عند الدكتور!! أو الواد ابو بربور في اولي ابتدائي، ولا البت اللي كانت بتزنقك في الضلمة بالازهر بارك، عشان تاكل منك السندوتش، بس اياك تحس ان كل من هب ودب بيعمل لك أدد تافه وهايف و عامل قاضي بما انه فاضي، كلا البتة هو كمان مشغول لكن بيحب يسلي نفسه وهو مشغول برده بمعرفة ناس جديدة، وزي ما قالوا ف مدغشقر معرفة الناس كنوز.
كمان بصة سريعة منك علي بروفيلز اصحابك هتقدر تعرف مين بيظبط مين؟ ومين مخاصم مين؟ لكن عشان محدش يعرف عنك حاجة ابقي اعمل هيد لكل حركاتك من علي البروفيل بتاعك خخخخخ
كمان هتقدر تزوغ من رئيسك أو زمايلك في الشغل بما أنك هتبقي فاتح صفحتك علي الفيس بوك، ضمن الصفحات الكتير الخاصة بالشغل-اذا كنت فعلا بتشتغل- ومحدش هياخد باله، وهتقدر تبعت رسايل سريعة لاصحابك، أو تشات، وتبعت لهم ورد، وشيكولاتة، وكل انواع الهدايا، وممكن كمان تدخل معاهم في ووتر فايت وكل دا وانت مقرطس الجميع، ومحدش واخد باله.

بس خلي بالك يا كابتن لو المدير بتاعك او حد من زمايلك بيعمل نفس عملتك ، او لو عاوز تنفض لحد رزل ولا مزة مش ولابد، يبقي ظبط نفسك وخليك اوف لاين، اللي عاوز يعرف ازاي؟

يبعت لي كام كيلو شيكولاتة، وانا هقوله علي جنب ، احسن تفتكروني بسيح و العياذ بالله
بس لو لك صاحب غتيتت غاوي يبعت لك عشر تلاف دعوة لجروبات ، ولا خمشعشرتلافف دعوة ، الافضل تعمله روموووف، ولو سألك قوله بعمل حملة نضافة للليستة، ونسيت ودلته غلط، ، واياك تفتح اللولب توظ بتاعك قدامه بكل رخامة هيقولك لو سمحت اعمل لي ادد دلوقتي .

بس فعلا أحلي حاجة لما بتكون غزالتك رايقة، وتدخل ترسم جرافيتي، اذا كنت من هواة الفنون، خصوصا الرسم. نصيحة ارسم لنفسك لان محدش هيعبرك م الفيس بوكاوية اللي انت تعرفهم
ولو أنت بقي فلحوس واذكي اخواتك، ونتاوي جامد طحن ،ممكن تبقي صاحب جروب معتبر، وممكن تسميه اي حاجة وتهييس براحتك، محدش هياخد علي كلامك، ولا حد هيتهمك بالردة، ولا يلبسك قضية ازدراء أديان، وللمرة العشرتلاف هتقرا الفاتحة للي اخترع الفيس بوك، زي ما بتقراها للمرسي ابو العباس.

Tuesday, September 11, 2007

والشعر الحرير ع الخدود يهفهف


يوم السبت اللي فات طقت ف دماغي أروح أقص شعري، عاااادي انا بعمل كدا كل أسبوعين تلاتة، بس المرة دي كان قصير جداااااااا، وبعدها استغربت شكلي جداااااا، ولما روحت البيت وطالعة ع السلم أتلكعت ولميته، عارفة أنى أول ما ادخل هلاقيها قدامي خبط لزق، وممكن ألاقي عصاية المقشة، زي زمااان. عشان تعرفوا ليه انا كنت قلقانة من ماما؟ اليكم السيرة الذاتية لشعري . ترررالالااام

مامتي حبيبتي زي كتير من الرجالة و الستات (خصوصا الصعايدة)عندها جمال المرأة بيتلخص ف كلمة واحدة شعرها، يا حلاوة ، طبعا هي مكنلهاش تخلف واحدة زيي، اخر حاجة بتفكر فيها شعرها، من زمااان وانا مبحبش الضفاير، كانت حاجة يع ، خصوصا مع الفيونكات (المقاطف كنت مسمياهم كدا)، كنت مصرة اقصر شعري، تقليدا لسعاد حسني ف افلام الابيض والاسود، طبعا انا فين وهي فين؟ بس اهو كنت بحاول، لما وصلت للاعدادية، مامتي حبيبتي اصرت اني اسيب شعري يطول، ودا تزامن بالظبط مع قرارها انها تبدأ تشتري لي الجهاز ، جهاز عروسة يعني، يعني تلاجة وغسالة ، وفرش وهدوم، وباقي الحبشتكنات، يا دي النيلة، طبعا كنت بتلكك انى ممكن اطنش اغسله، بالعافية تلاقيها هوب مسكته بالعافية وبلاش انتوا عارفين الباقي، طب يا ماما اقصه؟ وهي علي كلمة واحدة "ماخدوش يا بابا مخدوش" قصدي لا يعني لا ، وساعات كانت بتعمل لي زي ماري منيب وحركات قلبي قلبي ، حااااااااااضر خلاص اهو، وتخيلوا المأسأة واحدة زيي انا شعرها اصلا كيرلي عكس اخواتها الاتنين، مش بتحب الضفاير، وشعرها مش هينفع تعمله بوني تيل من غير ما يتنعكش، ويبقي منظره يع برده، دي ممكن تعمل ف شعرها ايه؟ تولع فيه؟

كام سنة عداهم ربنا علي خير، لو قريتوا البوست اللي فات بتاع المستشفي، بما ان معظمها غير البنج والحقن، كانت برده في ايام مراجيح، أصحابي قرروا يعملوا لي حفلة، وانا قررت اعمل نيولوك، أول حاجة كانت ايه؟ ايوة طبعا شعري، عشان ماما ما تتخضش، قصيته علي تلات مراحل خلال عشر أيام، كان طوله تقريبا 80 سم، ماما احتفظت به للذكري ، بعد شوية، مامتى حبيبتي قبلت علي مضض وكانت شايفة ان مستقبلي وحياتي الاوجتوماعية في خطر (يعني كانت فاكرة انى لو عنست هيبقي بسبب شعري، والله يا ماما انتى طيبة قوي)، وبقينا ساعات نروح سوا عند الحلاق، بعد شوية أكتملت المؤامرة، اختي محجبة، وكانت معروفة انها اطول شعر ف عيلتنا متر ومعرفش كام سم، بعد كام رحلة عند الحلاق، اختي فجأة قصت شعرها هي كمان، أمي عملتها مندبة، واتهمتني بالتحريض، وانا علي كلمة واحدة"انا يا ماما انا؟"مع وش برئ، مسبهل ومندهش، نياهااااااااا (دا انا ف سري)، بعد كام كلمة ف جنابي انا واختي، علي حركتين من بتوع ماري منيب ، مشيت الحياة .

بعد قص شعري بسنة تقريبا، سافرت للخارج، وبما ان مكنش في وقت بجد اني اروح للحلاق، وكمان كان غالي جدااااااااا اني اروح للحلاق عشان الزمبليه ، يعني حوالي 75 يورو عشان تقص شعرك، وكمان بكره حاجة اسمها سيشوار، يا دوب ممكن انشف شعري من بعيد لبعيد، وكمان مش بحب الرولو وكل الحركات بتاعة البنات، اللي الواحدة تبقي نايمة وحاطة كام مشبك غسيل، علي كام قلم جاف، واحتمال تلاقي حبلين غسيل، م الاخر بما ان البلد اللي محدش يعرفك فيها سيب شعرك براحتك، واوعي الحلاق يجيي جنبه، فاسبته علي طبيعته، مكنتش بعمل فيه حاااجة، بغسله بس والله، ساعات بضرب جيل لما اكون ف رحلة كدة ولا كدة.
ثبت الوضع علي كيرلي قصير، وامعانا ف الاعتزاز بملامح الشرق اوسطية (ايوة اسمها كدا) وبعد الحاح من اصحابي، قررت اخلي لون شعري اسود، اسود وكيرلي، صحباتي الاربعة اتجنن منهم تلاتة راحوا عملوا شعرهم برمننت عشان يبقي كيرلي، يا حلاوة محدش عاجبه حاااله. وانا شكل شعري بدأ يعجبني جدا، وكنت بمشي عندي احساس بالاطة و التميز، بشعري، ولون بشرتي الغامق، وبما ان زميلاتي ف الدراسة معظمهم كان من كولومبيا والبرازيل، وكوبا، كان عادي ان حد يجي يكلمني لاول مرة يكلمني اسبانييي، يا نهااااااري ع الحوسة، مرة طالب جاي جديد مصر انه يكلمني اسباني، اقوله يا سيدي مش بعرف غير كومس تاس؟ يقولي دومنيكان ولا البرازيل؟ كان دايما المشهد بتاع محمد هنيدي بتاع صعيدي ف الجامعة الامريكية والطالب الاسمر.

اول بقي ما رجعت مصر، الغتاتة بدأت م الطيارة، (هحكيها ف بوست تااانى) وف المطار خناقة مع ظابط الجوازات عشان شكلي مختلف عن صورة الباسبور، اول حد اتصدم م العيلة كان اخويا، قبل حمد لله ع السلامة، هو واولاد خالاتي، انتي عاملة شعرك كدا ليه؟ طب شيل الشنطة مصر علي تكرار السؤال، رزعت الشنطة علي رجله عشان ننجز. أول ما روحت البيت مامتى كانت علي وشك انها ترقع بالصوت ، يا عيني يا بنتي تلاقيكي ملقيتيش وقت تغسلي شعرك قبل ما تيجي؟ قدامي ع التواليت طب اقولها ايه دي؟

في الشارع طبعا حدث ولا حرج، كم التعليقات اللي ممكن تسمعه واحدة شعرها كيرلي ف الشارع مش ممكن، "دي بتشحن علي 180 فولت"، واللي يقول" انا نفسي اتكهرب"، مرة بقي سواق تاكسي مكنش عاجبه شعري مرديش يركبني التاكسي، وواحد تانى فعلا كان بدأ يقطمني علي انى سايبة شعري من غير اهتمام دا من وجهة نظره طبعا. اه شعري أقنعني ان فعلا في جزء عنصري من الشارع المصري، لا يقبل غير المعتاد حتي ولو كان ف المظهر، حتي ولو علي سبيل المعاكسة، المعاكسة عندنا شتيمة، المعاكسة ف دول تانية ممكن حد متعرفهوش، يقولك صباح الخير ويروح ماشي من غير ما يقف، او أنه يقدملك وردة وانتي راكبة الاتوبيس الصبح، لمجرد احساسه انه شاف حاجة جميلة وبس ، ولو واحد ممكن يتقال عنه أنه وقح هترسي علي انه يقولك "ممكن المس شعرك بس؟" ولما هتقولي لا يبقي لا وهيعتذر ويمشي .

رجعت مصر قبل رمضان اللي فات، وع العيد قررت اروح عند الحلاق اعيد تلوين شعري بالاسود، أختي زي زمااان قررت تيجي معايا، روحت واختارت نوع الصبغة، وقعدت، وبما انى مؤمنة بأني أدي العيش لخبازه مش بدخل خالص ف شغله، وعشان كدا انا من زباينه اللي مش ممكن يفرط فيهم، بعد ما زهقت م المجلات، ببص ع المراية، وبعدين عيني نزلت علي الاستند اللي قدامي لاقيت علبه مش متعودة علي شكلها، علبة كريم لفرد الشعر، نعم؟؟؟ طبعا انا ينطبق عليا المثل اللي بيقول "أطقي شر الحليم اذا غضب" لو اتنرفزت ودا مش بيحصل بسهولة، ممكن اخربها، حمااااااااادة عملت ايه ف شعري؟ ايه دا؟ صبغة ولا برمننت؟
قالي برمننت، ...أختك قالت لي قبل ما تيجي بيوم انها عاوزة تعملها لك مفأجأة ، نعم مفأجأة ، كان اول مرة من وقت طويل، أتنرفز واتعصب جااامد، وأسرد كل قاموس الشتايم اللي كنت مكسوفة اقول كلمة منه علي مدار سنتين، وكملت الوصلة ف البيت، بعد ما خليت حمادة يهد المولد اللي عمله ف شعري، (طبعا بعدها حصلت فيه بلاوييي لكن ربنا ستر) ف البيت ماما واختي ميتين م الضحك ومصهللين ع الاخر، وانا بزعق وبتخانق، وعليه تمت المؤامرة وبقي مفيش شعر كيرلي.

الكلام دا كان يناير اللي فات تقريبا، واخيرااااااا وبعد تسع شهور، طلع لي شعر كيرلي، لكن الاطراف مازالت استريت، وعشان كدا سيادنك وحضرتك بروح أقص شعري كل اسبوعين تلاتة، والاسبوع دا تقريبا كان خلاص مفيش استريت .
ملحوظة:
مفيش جهاز عروسة دلوقتي لاني شحت معظمه هههههه

Thursday, September 6, 2007

مرجيحة كروية

الي يعرفني كويس يعرف اني أخر واحذ في كوكو الارض يفهم في الكورة
بالرغم من اني بفهم كويس في الاشكال الكروية بطبيعه دراستي
الي يعرفني يعرف اني بكره كل الاعيبة
وكل الانية بدايه من نادي القرن لنادي الستة
المهم اني لقيت تسجيل لمطشين نادرين جدا
والي مسجلهم حد نادر جدا برده في زمانا ده
والمطش الاول بين الاهلي والترسانة و الاهلي اتغلب فيه تسعة صفر
ومحدش يتعجب كان زمان الاهلي بتغلب عادي يعني
اسمع وقول رايك




المبارة التانية بين الطيران والاسماعيلي
ومحدش يستغرب كان الطيران زمان فريق وفريق قوي





Monday, August 27, 2007

في دايرة الرحلة طرق بنا تخلا..... بس أكيد هتحلا لنا



البوست دا طويل جدااااااااااا ، وكمان معظم أحداثه كانت في مستشفي، وكمان كان


حادث ناس كتير بتشوفه مأسوي، وانه النهاية

بس أوعدكم أنكم هتتمرجحوا، لان حتي دا قلبته مراجيح .

بعد ليلة ف مستشفي جامعة عين شمس التخصصي، انتقلت لمستشفي الهلال الاحمر الفلسطيني، او مستشفي فلسطين الدولي، مش عشان انا فلسطينية ولا حاجة، بس عشان كان لي اصدقاء اعزاء يعملون بالمستشفي، وكمان توغلي ف وسط بعض الفلسطينيين الموجودين في مصر.

اول يوم كنت ف اوضة صغيرة لفرد واحد ، كنا الصبح ف 28مايو 2003،اللي لحقت اشوفهم كان احمد اخويا، ود. نادية ، د. امال أستاذتي ومديرتي ف مكان عملي، وبعدها نمت لمدة 24ساعة بالظبط، وانا ف وداني سامعة الدكتور زين بيقول ان الزيارة ممنوعة، كمان يوم وتعالوا شوفوها، وواقف بيقيس الضغط، والممرضة تقوله ايه دا كل دول قرايبها؟ وهو ينفخ ويفش، انا كنت ف الباي باي.

اليوم التالت بدأ اصحاب كتير يجوا، وقرايب، وناس معرفهاش، مدير المستشفي، د. حسام قرر ينقلني لمكان اكبر جنب مكتبه حفاظا علي نظام المستشفي وسهولة الحركة ف الدور، وكمان عشان يسع الاعداد اللي بتيجي، ف اليوم دا انا بدأت استوعب انا فين، كانت نظيمة صحبتي جات من السويس بالصدفة، وافتكرتني بعمل عملية زايدة، فاتصلت بأمها ف السويس وبلغتها انها هتفضل معايا، احنا مكناش بنغيب عن بعض ابدا، وهي طالما ف القاهرة بتكون معايا ف بيتنا، اول حاجة عملناها سوا، اني مش عاوزة اشوف حد، وكتبت علي ورقة بالفلومستر _كان دايما قلم فلومستر ف شنطتي _"ممنوع الزيارة بأمر الدكتور"، وبلغنا دكتور زين، اللي بدأ يفك التكشيرة، وعملنا اجتماع ثلاثي، انا هعمل ايه؟

اصل من يومي بخاف م الحقن، وشكة الدبوس، ودلوعة جدتي كمان، زين قالي دي شكة دبوس، وانا صدقته بالعافية لاني حبيت اصدق، مكنتش شجاعة ولا حاجة زي ما ممكن تتخيلوا، كنت طبيعي جدا بما انى واخدة ع التنطيط ولعب الكرة عملاها مندبة،عادي يعني ..كفاية نكد كدا عليكم.

لمدة اسبوع وانا مش بشوف حد الا اصحاب البالطو الابيض، ونظيمة، واحمد صديقي، مكنش صديقي قوي ساعتها، بس كان مصمم يزورني كل يوم ، لسه فكراه لما كان يجي يزورني مهدود وطالع عينه ف عز الشمس، وشايل شنطة الخضار، قصدي شنطة كتبه،اللي مش بتفارقه حتي يوم الاجازة، وبينهج مع انه طالع ف الاسانسير، انا فاكرة مرة حب يسليني جاب لي شريط كاسيت لمنير "انا قلبي مساكن شعبية"، واول غنوة سمعتها كانت "في دايرة الرحلة "

"في دايرة الرحلة طرق بنا تخلي

اه يا حبيب عمري وصحبتي وجمري "

"عيون مرة تباعد خطاوي مرة تعاند ...

حنين جوانا يحكي وشوق جوانا يبكي

والدمع ساقية كبت" ...

في دايرة الرحلة... طرق بنا تخلا

عند الجملة دي وعنيا دمعت لاول مرة قدام اي حد ، واحمد مكنش عارف يعمل ايه؟ يرمي الكاسيت م الشباك؟ ولا يطبطب عليا؟ ولا يجيب لي مناديل؟ ولا ينادي ع الدكتور؟ من لخمته روحت ضحكت غصب عني، من يومها انا واحمد مفترقناش الا لما سافر هو عشان الماستر، ورجع ولا كأننا افترقنا، بس كمان كل مرة اسمع فيها الغنوة، بحس بحاجات متناقضة، بفرح لما اسمع الغنوة، لكن كمان بحس بمرارة الالم لموقف كنت بعيشه، وبفتكر احمد لانه هو اللي سمعني الغنوة اول مرة اسمعها، فبضحك غصب عني .

من اليوم دا احمد زكي الوحيد هو اللي كان مسموح له بالزيارة دونا عن الناس كلها.

ندخل بقي ع المراجيح ؟ طيب ، اول المراجيح كان دكتور عبدالله ، الطبيب النفسي زارني، وسألني اخبار الاحلام المزعجة ايه؟ رديت اني مش بحلم خالص، وكل ما يسألني سؤال أكدب طبعا واقول العكس، عشان اطمنه، واطمن اللي موصيينه عليا، هو خرج من عندي وقرر يدرس طب نفسي تانى.

بعدها بدأت المراجيح، انا شلت ورقة ممنوع الزيارة بنفسي من ع الباب،الزيارة المفروض ف المستشفي تبدأ من تلاتة اخر النهار لحد الساعة ستة بس، انا ضيوفي كانوا بيبدأوا زيارة من تسعة صباحا، لحد واحدة بالليل، ومعاهم عود ورقص وغني واللي عايز يغني يغني، وكل صديق يجيب صديقه اللي معرفوش، واحيانا كل مرضي الدور ممكن تلاقيهم عندي ف الاوضة ، واصحي الضهر الاقي في اصدقاء واخدين الصالون بتاع اوضة دكتور حسام مدير المستشفي وحطينه قدام باب اوضي وفي الكوريدوريو، وقدام الشباك .

الشباك دا كان حكاية في نهاية الكوريدور وعلي اليمين من اوضتي، وقدامه علي طول حمام سباحة بتاع فيلا محصلتش، كل يوم خميس بيكون في حفلة قدام البيسين، حبة من اصحابي بطلوا يروحوا السنيما، وبيجوا يتفرجوا ع البيسين كل خميس، وانا اقول طيب يا غجر. فكرت اعمل لهم الزيارة بتذاكر زي السنيما .

وكمان كان كتير امال ونظيمة ينكوشوا بعض ويتخانقوا مين اللي هيبات معايا؟ كنت ف الاخر بسلم امري لله ووداني لشخيرهم هم الاتنين .

اه انا كنت ممنوعة م الاكل وممنوع اي اكل يدخل اوضتي عشان البكتريا، الوحيد المسموح به، كان لبن جهينة ،احيانا بالفواكه ، فا كل اللي داخل شايل كراتين لبن جهينة، طب يا جزم بالشيكولاتة؟ لا سادة او بالموز او الفراولة، يا كفرة مالها الشيكولاتة؟ طبعا معدتي ف وقت اعلنت العصيان المدني علي اللبن، من ساعتها لمدة سنة مبهوبش جنب اي منتج البان خصوصا جهينة.

كان المفروض في كافيتريا ف الدور الاخير م المستشفي، كانت زي صالون قدامه تراس، وفي تليفزيون كبير، أنا فاكرة ان اول حاجة شفتها كانت كليب لاصالة غنوة "سنين" يا سيدي ع النكد ، أصلها ناقصة، لما سمح لي الدكتور اخرج من أوضتي طلعته اتخضيت بما انه فاضي وانا بحب الزحمة، بعدها لما اصحابي بيجوا بقينا نطلعه وماليناه ناس، واتشجع باقي الناس ف المستشفي يطلعوه، قبل ما اخرج اتقلب حاله بقي في حفلة كل شهر، وفي فرق غني ومزيكا ودبكه،وبعد ما خرجت بقي فيه مكتبة وانترنت، وسوق مشغولات يدوية كمان :)

وعلي مدار سنة بعد خروجي كنت بروح الحفلة كل شهر.

من الصدف بقي أني في اثناء جولاتي الليلية بما اني مكنتش بنام نهائي بالليل، المورفين واخواته مكنوش بيجيبوا نتيجة معايا، طلعت مرة الدور بتاع المسنين،مشرفته كانت دكتور نادية ، قابلت مين؟ سعد عبد الوهاب ، وبقينا صحاب، وكان كل ما اجيب له سيرة " الدنيا ريشة ف هوا"، يتغاظ ويقولي انتوا محدش يعرف الا الغنوة دي؟

من الصدف اللي فكراها، كان ايمن ودا كان ف معهد ناصر، من مصابي الانتفاضة، الرصاص كان مخترق معظم جسمه(18طلقة رصاص)، لما اتقابلنا ف المستشفي كنا احنا الاتنين ماسكين عكازين خبطنا ف بعض، روحت مزعقة، وهو مزعق، وقبل ما نشتم بعض كنا ميتين م الضحك، وسالني بتهببي ايه هنا؟ مكفكيش معهد ناصر ومصابيه؟ قلت له سمعت انك هنا، وراسي والف سيف اعمل حادثة واجي مخصوص هنا.

مع كل عملية كان لازم يبقي في نقل دم، وبما ان مفيش زيي اصحابي وقرايبي كان معظمهم عيال كدة حيطة وجامدة ، المستشفي كانت بتهيص اول ما يقولوا متبرع، عشرة تلاقيهم مددوا وانقل كل الفصايل يا كابتن، بما اني فصيلتي o سالب ودي مش بيلاقوها بسهولة ، كان الوحيد المتشابه ف الفصيلة صخر صديقي الانتيم وقتها _ فلسطيني من بيت لاهيا، كان اول ما جه مصركان لسانه بينقط دبش خصوصا مع البنات ومش بيسلم، كام شهر واتعالج مكنش بيروح يشتري جزمة من غيري، الله يرحم ايام الحمام ف بيت عمك ابراهيم يا صخر ههههههه صخر كان اشقر واحمر وعنيه عسلي ، وكل ممرضات قسم الجراحة كانوا بيتزرعوا ف الاوضة مش عاوزين يمشوا لو جه يزورني، كلهم كانوا متوقعين اني هبقي شقرة من كتر دمه اللي شحتهوني، وكان زالل اهلي كل شوية يمسك دراعي ويقولي شايفة الاحمر والاشقر دا دمي، ومش بعيد تبقي شقرا" خلاص يا عم الامور شكرا ياعم كتر خيرك يا كابتن ههههههههه

اما البنج بقي مع كل عملية، فا يا ويله وسواد ليله كل اللي كان قايل لي سر قبلها، اتفضح ، واتعملت له زفة ولا زفة المطاهر، لان اصحابي كانوا مجموعة شلل مش شلة واحدة، شلل متعرفش بعض بس تعرفني ، دكتور زين يلم الجميع، وقبل ما افوق بشوية، ينزل فيا أسئلة عن فلان وفلانة، وانا اقر واعترف بكل براءة، جمال دا عامل فيها واد تمام بس متعرفوش انه بيروح ... وهناك.. وبيش... وهكذا، مرة قريت واعترفت علي ممرض كان بيعاكس ممرضة، ف اوضة العمليات، الدكتور شد ف شعره لانه كان متأكد اني متبنجة جااااامد .

طبعا انا اتعلمت هناك كل الالعاب حتي الاستغماية، مع نزلاء قسم الاطفال، اتعلمت طاولة واتحدي اي حد فيكم يغلبني ، دكتور زين وصديقه اللدود دكتور وليد(علي طول كنت تشوفه عينيه حمرا م السهر يا لسه صاحي يا رايح ينام) طول الليل يرزعوا في القشاط (البتاع اللي بنلعب به طاولة)وكمان كونكان، ودومينو، بس مازلت حمارة شطرنج، اعرف بس خطوات كل قطعة، لكن بخسر بسهولة هههههههههه.

كله كوم ويوم الخروج م المستشفي كوم واللي بيفهم طب نفسي ممكن يفهم ، كنت ارتبطت بالمكان والناس والاجواء جدا ، وفضلت أأجل خروجي علي مدار اسبوعين ، خرجت يوم 23 يوليو وكان اجازة رسمي ، الدكتور حسام مدير المستشفي جه مخصوص يمضي لي اذن الخروج ، ومضاه في الشارع ، وهو ساند علي العربية، وقال جملته الخالدة "اخيرا المراجيح هتنفض ويرجع النظام للمخروبة" يقصد المستشفي ، اما بقي لما روحت بيتنا تاني يوم ملقتش ولا جزمة ولا صندل ولا سابو، لاني امي شحتتهم كلهم ههههه حرصا علي مشاعري وزعتهم كل ما اقول الجزمة البني فين؟ تقولي بنت خالتك استلفتها، طب الصندل الفوحلقي فين؟ بنت خالك كانت حاطة عينها عليه وانا طيبت خاطرها وقلت لو خرجتي بالسلامة هديه لها ، طيب يا جزم انا ف المستشفي وانتوا بتقسموا ف جزمي؟ بعدين اختي فهمتني علي جنب انا كنت بتضحك بس متغاظة لان هوايتي كانت شرا الجزم بس بطلت والحمد لله ههههههههههه
اتحسرت اوي علي الصندل الابيض، كان شفتشي خالص وعالي جدا

مازلت محتفظة بصورة ظاهر فيها، دا بس عشان اغتت علي بنت خالتي اللي ماصدقت ولهفته

اتمرجحتوا؟ اسمحوا لي انكد عليكم؟

انا كتبت البوست دا بسبب سؤال من صديق عزيز جدا، عن ازاي قدرت اخرج م الموقف دا؟ وقتها معرفتش اجاوب زي ما انا حاسة، وهو كان رايه ان سؤاله سخيف، لا يا سيدي انت بس اللي حساس جدا، اكتر حاجة ان كان ومازال في حب من ناس كتير قوي، بقول حب مش شفقة ولا عطف من حد، حب من اصحاب واهل . ناس مستعدة تعمل اي حاجة عشاني وانا مستعد اموت عشانهم،

احمد كان معايا ف المستشفي قاعد معايا بيقرا لي كتاب ،

خالد وامال بيختاروا اللون الفسدقي لحيطان اوضتي ،

احمد زكريا بيغير لي الكمبيوتر ،

عمو عبد القادر طالع نازل كل يوم من الزيتون لمصر الجديدة، واول ما سمح لي الدكتور بالاكل ام جميل طبخت مسخن وهو شاله سخن وجابه لي ف المستشفي،

احمد اخويا عمل لي مكتبة اكبر بنفسه، اشتغل فيها لمدة شهر

، أدهم كان بيعمل اجتماعاته للتباحث في امري، مع اننا مكناش نعرف بعض، وأتأجل تعارفنا تلات سنين ونص، وفين وفين لما فهمت انه كان يعرفني وبيسمع عني من أصحابي

.بالناس تقدر تعمل كتييررررر،وتتخطي اي ازمة ف حياتك ،لان الاصحاب مدعوين في أزمنة الفرح ، وكمان ف وقت الشدة، بس المهم انت متهربش منهم ، وتقول اصل مش بحب اسخف علي الناس ، عن الموقف دا بالتحديد احمد كتب مقال صغير بعنوان "أزمنة قادمة للفرح"اكتر جملة فاكراها دي : كتب امل دنقل "علي بريد الشمس قتل القمر" ..." الجميع شكلوا دائرة لاحتواء الالم، ....فنحن نكتسب أحساسنا بالمقاومة من غيرنا".

الاصدقاء فعلا ممكن يكونوا دايرة تحتوي الالم

وطول ما في اصحاب بيحبوك بكرر اصحاب بيحبوك مش ناس بيتعاطفوا معاك بس، قلبك هيبقي قلب اسد ... نياهااااااااا

والرحلة مسيرها يوم تحلا لنا

وبالعند ف حاجات كتير هتحلالنا

انا بسمعها دلوقتي ...

حتي اسمعوا؟

ف دايرة الرحلة ايام مع المولا

ليلنا يا ليلنا مرة هتحلا لنا

تميل علي ميلنا في دايرة الرحلة

رحلة يا رحلة يا صعبة يا سهلة

رحالة خطوتنا في دايرة الرحلة

هههههههه :)

صحيح كانت مستشفي بس كانت فعلا من احلي ايام حياتي

Friday, August 24, 2007

دى بتاعت ماماااااااااااااااا...أعااااااااااا

عيد ميلاد طفلة جميلة من أطفال العائلة الحلوين المؤدبين الهاديين...وبالطبع كما يحدث للجميع فأن الطفل الأول الذكر هو من يحوز اهتمام ولع وتهنين الأبوين....لكن الطفل الثانى لو كان بنوتة يبقا يا سعدها يا هناها وأوعى وشك...ففى عيلتنا تتميز الفتاة بوضع خاص ومميز جدا....يتعامل معها الجميع على أنها كائن مرسل هدية لأبويها....بسكوتة مينفعش تتعامل معاها بخشونة او عنف وكل طلباتها مجابة...وأى علقة سخنة الولد أولى بيها....لأنه يستحمل....انما البنوتة؟؟؟....يختشى عليهااا وعلى كتاكيتها وهى لابسة كرانيش ولا فستان من غير أكمام أو بحمالاّت وديل الحصان طاير وراها كدة
أميرة من قصص الأطفال الجميلة
هو دة مفهوم البنوتة فى عيلتنا
سرحت من الموضوع كتيرالمهم كنت بأتكلم فى عيد ميلاد البنت آلاءحفيدة خالتو بنت ابنها الكبير
وخالتو عندها أربع أبناء رجال كلهم
تلاتة متزوجين والرابع على وشك
والأحفاد ما شاء الله عملوا قبيلة لوحدهم
أكبرهم فى سنة أولى ابتدائى واصغرهم عمرها شهرين....وزوجات الأبناء متفاهمين وحلوين جدااا مع بعض
محمد
عمره من عمر آلاء صاحبة الحفلة
تلات سنوات وابن عمها
الولد استنا لما الكل اجتمع...والبيت اتملا بشر
ووقف بعلو صوته على كنبة الأنترية
ونادى على مامته فى وسط الناس
ماماااااااااا....العباية اللى انتى لابساها دى مش بتاعتك....دى بتاعت طنط منـــــــــــى
طنط حناااااااان.....اقلعى عباية مامااااااااااااا
أن أن آآآآآآآآآآآآآآآآآن
اسكت يا ولد...يا ولد اخرس
منى دى بنت عمها وبنت عم زوجها كمان وجارتهم هى وزوجها...وطنط حنان دى مرات عمه..صاحبة الحفلة يعنى
قامت بنت منى من مكانها...ونطت جنب محمد عالأنترية تبص على عباية مامتها اللى لابساها طنط مامت محمد

أعاااااااااااااااااااااا دى بتاعت ماماااااااااااااااااااا
اقلعيهااااااااااااااااا
وكان هذا ايذانااا لكل أطفال العائلة المؤدبين المحترمين بالتدقيق والتفحيص فى ملابس أمهاتهم ومن معهم فى الحفلة
واكتشف العيال أن كل أمهاتهم مبدلين العبايات ولابسين مع بعض
عادى واية يعنى؟؟؟؟؟؟....كل الناس كدة
بس مش عادى فى نظرالعيال....وبدأت فصول التجريس
وكل عيل راح شبط فى ديل واحدة لابسة عباية بتاعت امه
أعاااااااااااااااا ااقلعى...بتاعت ماماااااااااااااااا
وكل أم محتاسة فى اللى بيشدها وعاوز يقلعها ومش عارفة تجرى تحوش ابنها او بنتها اللى ماسكة فى ديل حد تانى...تشد ديل العباية من ايد العيل ومحتارة تضحك ولا وشها يحمر من الكسوف؟؟؟؟حاجة تحير برضة
ولسة برضة العيال مصممة تخلى الستات تقلع هدومها ودلوقتى حالااااااااا ....والا لن يتوقف الصراخ والنواح وتلطيش الكريمة والحلويات فى الهدوم بفعل ايد العيال
وبدل مايقلعوا العبايات
اكتفوا بيها متشخبطة ومليانة بألوان الجاتوة أشي أبيض على أصفر على شيكولاتة..واللى حظها كويس لبست طبق كريم كراميل على هدومها
الرجالة بأدور عليهم...ملقيتش حد فيهم واقف على حيله
لقيتهم واقعين على الأرض فطسا من الضحك
طلبت منهم يزعقوا للأولاد أو يمنعوهم ويهدوهم علشان الحفلة تعدى على خيرطلع لى ابن خالتى الكبير صاحب الليلة
سيبيهم...يستاهلوا
يعنى هم دواليبهم فاضية؟؟؟....ولاّ هو سلف الهدوم من بعض مزاج؟؟؟
أهم اتفضحوا أدام المعازيم
وفييييييييين
لما العيال سكتت واتلهوا عن حكاية الهدوم
وفين وفيييييييين... لما افتكروا انها حفلة عيد ميلاد ومفترض انهم ينبسطوا ويفرحوا ويلعبوا ويلوّغوّا فى الجاتوهات والكريم كراميل والجيلى والبالونات ويبتسموا ادام كاميرا الفيديو
ناهيكم أن تفاصيل المعركة تم تسجيلها بالصوت والصورة....والشريط لف على بيت بيت....وطبعا لما وصللى طبعا طبعا...عزمت كل العيلة وعيلة العيلة تتفرج عليه
حكم أنا تخصص لامؤاخذة تجريس
وياللى متعرفش اعرف
وهييييييييييييييييييية
واللى كمان يشوف المعركة...كان حيعتقد انها تمت بفعل فاعل وبترتيب مسبق...وكان جيش الاحتلال يتكون من 6 أطفال تتراوح أعمارهم ما بين شهرين وست سنوات
وأعتقد دلوقتى ان محدش فيهم حيفكر تانى انه يعمل عملية تبادل مرة أخرى مع الأجناس المجاورةخوفا من الفضايح والجررسة
ربنا يستر علينا وميوقعناش تحت ايد عيال ياااااااااااااا رب

Thursday, August 16, 2007

saluta'a Italia

دا المسكين ريكي


فجأة الصبح الساعة 7 اتصل ريكاردو زميلي ف الشغل، تحبي تروحي بادوفا؟
وانا نص نايمة وصاحية، بسب ف اهله بيصحيني يوم الاحد اللي هو الاجازة
سبعة الصبح، ومش فاهمة بيقول ايه؟، كرر سؤاله بالانجليزي المرة دي، بادوفا دي ايه كمان؟
قالي مدينة جميلة، مكملش الجملة وانا رميت البطانية، وصحصحت نص
ونص ، نص ساعة بالظبط كان بالعربية تحت البيت، وانا والفريق الانتحاري
بتاع الرحلات ، نوريت وماريا ، مترصصين قدام العربية، نص نيمين ومش معانا
اي شنط، غير شنط البنانيتي دي الصغيرة، فيها فلوس وموبيلات بس، تلات
ساعات ف السكة، احنا التلاتة ف سابع نومة ، وماريا صوت شكمان
مناخيرها كان عالي جدا، اما ريكاردو المسكين سايق العربية وبيسمع مزيكا
ع الكاسيت لان عربيته مكنش فيها كاسيت، موديلها قديم ووارثها عن ابوه، قبل
ما نوصل بنص ساعة، كنت اول الصحيين، سألته عن الحكاية، قالي انه رايح
يحضر سمنار عن مايكل انجلو، بما انه من دارسي الفن، ورسام،وقال بالمرة ياخدنا
معاه بما اننا فقرا ومجانين سفر وتجوال، واهو نشوف بادوفا، علي بعد نص ساعة شمال
فنسيا، وجامعتها اللي من أقدم جامعات العالم في أوروبا، وكانت اول
جامعة دخلتها المرأة في أوروبا كلها.


دا الفريق الانتحاري
وصلنا ريكاردو سابنا قدام أول كافيه عشان نضرب قهوة وتراميسو، ونخطط هنعمل ايه؟
كانت اول مرة اسافر ومش معايا خريطة، او اي كتاب عن المدينة، او
حتي اعرف عن المدينة حاجة، قلت لصحابي اللي يسأل ميتوهش، طبعا بصوا لي
بصة، وماريا بتنكشني زي العادة، انتي فاكرة نفسك ف مصر؟ بكل الاطة قلت لها لا فاكرة
نفسي في "نوفي ساد" ، مسقط راسها ف صربيا، أو نوفي سعد علي سبيل التريقة وغيظها ،وان
الخريطة هي دايما كانت مهمتي ف كل رحلة،وعليه كان لازم الاقي محل تباكينو، اللي هو البقال اللي بيبيع
خرايط او تذاكر باص، وبما انه الاحد وقافل، الجيش بيقول اتصرف
اوك، سألت عن محطة الباص الرئيسية، ولاقيتها مشي عشر دقايق،
وادينا بنتجول، وقدام المحطة، كان في خريطة تسد عين الشمس عن اهم
الاماكن اللي ممكن نروح نشوفها، وبسرعة طلعت القلم والبلوك
نوت بتاعتي، ورسم كروكي معتبر (كان اي كلام لاني مبعرفش ارسم خرايط او حاجة فيها اتجاهات)، و
علي جنب اسماء الشوارع، واهم الحاجات
اللي فيها، وبدأنا الرحلة، كانت سهلة ف الاول، يعني شوفنا الدومو يعني الكنيسة الرئيسية، والسوق، والجامعة،
وحاجة كدة عاملة زي حديقة الخالدين، فيها مايكل انجلو وتلميذه روفائيليو، وناس تانية
كتير، وصممت أني اشوف سوق الزهور والورود،
وهنا بدأنا نتوه، وانا مصممة اروح، البنتين اتخنقوا مني، وكرهوا الورد من
يومها، ساعتين بندور علي الشارع، وبالظبط زي الصعيدي اللي دماغه
لفت وراح لها م الناحية التانية، ف الاخر فوضت امري لله، وتراجعت
عن الفكرة، طب نعمل ايه؟ لاقينا نفسنا قدام كوافير، اسمه مشهور جدا، وماركة
مسجلة، ولاقيناه عامل خصم، قص الشعر، 35يورو بس، بصينا لبعض كدا، وقلت ها ايه رايكم؟ مش احنا كنا عاوزين نعمل اي نيولوك ، ومش عارفين لان في بولزانو ، الاسعار دبل؟
المرة دي ماريا مشيت ورا كلامي وقالت اه ندخل، نوريت
بقي هي اللي قالت الجملة المشهورة، انتي فاكرة نفسك في مصر؟ برده بكل الاطة، لا
يا المانية يا اللي حاسباها بالمسطرة، الحياة ابسط من كدا، صممت ان
الراجل الكوافير، مش هيوافق لاننا مش حاجزين معاد، وانا صممت انه
هيوافق، صحيح احنا مش ف مصر، بس احنا كمان مش ف المانيا، احنا ف
ايطاليا، و أكيد مش هيرفض، اكتر من 100يورو عشان مش واخدين
معاد، كمان احنا مش اي كلام لا مؤاخذة، لا دا انا من امبابة، يعني
كل منطقة ولها محطة، الا امبابة ولها مطار، وافقوا وقالوا اوكي، صدروني في
وش المدفع، وكلمت الراجل، وافق بس طلب
اننا نرجع بعد روبع ساعة عشان يفضي لنا مكان،وروحنا نضرب واحد جيلاتو ،.

دخلنا انا وماريا بما أننا عالم تالت كنا فاكرينه كوافير حريمي بس، طلع
رجالي كمان، بعد ما قعدنا تحت المقص، مترصصين علي كراسي جنب
بعض، واكتشفنا الورطة، اننا مش عارفين نشرح بالايطالي احنا عاوزين ايه؟
نقص كاريه، ولا زمبليه؟ كرلي ولا ستريت؟ و ولا واحد م اللي في المحل بيتكلم
اي حاجة غير الايطالي، طب مفيش حد المانى؟ حد كرواتي؟ صربي؟ دا
ولا حتي حد من تاهيتي، بس الطليان برده جدعان من المنشية،
كل زباين المحل تطوعوا بالمساعدة، الكل حوالين في دايرة ، واحنا نخبط بكل اللغات والحدق
يفهم، الصور ف المجلات، ولغة الاشارة، وكل الكلمات بالانجليش بس اخرها حرف الأو
ال يعني بنعرف ايطالي، ف الاخر رست علي ايه؟ اللي شعرها
كيرلي فرده، واللي طويل قصره، والقصير برده قصره، ونكشه كمان
زي محمود الخطيب في التمانينات، وزي مايكل جاكسون زمااااان للي مش غاويين كرة.

قبل ما ندخل ماريا بما انها غاوية تصوير عمال علي بطال، وبشكل
يغيظ، كانت اخدت لنا صورة عشان نقارن بعدين، الفروق، وواحنا خارجين
صممت تصورنا بمنظرنا المفتكس دا، مع الراجل الحلاق، اللي كان منشكح
و مبسوط بانجازاته المعملية في شعرنا، قررنا نغادر المدينة، خلاص
تعبنا، الووو انت فين يا ريكي؟ انا بزور اختي بالمرة واحتمال ابات عندها، شكراااااااااا، يلا بينا علي
القطر، نوصل المحطة متأخرين، واخر قطر بيتحرك، القطر اللي جاي الصبح
الساعة ستة عليكم خير، طيب، جولة ف المحطة اللي كانت هوس هوس، طب
نروح ناكل بقي ، ونكمل الجولة، طبعا الفريق الانتحاري هيفرقع، وانا واخدة
الامور ببساطةةةةةة تغيظ ، صحيح كتفي اتخلع لما نزلوا فيا ضرب، بس
ولا يهمني ، ساعة ، وبعدها جات النجدة، ريكاردو هيرجع معانا، ومنتظر
قدام المحطة، ونوصف له احنا واقفين فين، وبرده مش عارف يعتر فينا، لاقيناه
واقف جنبا بس بضهر، وبسبب مخه التوسكاني (نسبة لتوسكانا صعيد ايطاليا) مش
مقتنع ان الخلق دي هي اللي شافها الصبح، عشان النيولوك، واول ما عينا
جات ف عنينا هههههههههههههه وقعنا م الضحك، وهو معلق علي سؤال:
Cosa avete fatte?
يعني هببتوا ايه في نفسكم
؟

Tuesday, August 7, 2007

حواء

عشقي للمرأة لا يؤمن بالدوافع و الأسباب ، ولا يحتاج إلى تبرير أو تعليل و لا يحتمل فحص أو تحليل أو هرطقة فرويد في إلصاقه اسم أوديب بعقدته الشخصية لتجنب اقترانها باسمه

عشقي لا هو عشق أسطوري يضرب بقوانين الدنيا عرض الحائط، ولا هو عشق أفلاطوني أو عذري
لا هو صلد ولا لين، بل يتشكل مثل الماء
حبي لحواء لا يفنى و لا يستحدث من عدم، فلا يفنى برحيلها و لا يستحدث بدون سحر وجودها الأول
لا يتجزأ و لا يدعي الوحدوية ولا ألإلوهية

عشقي لها يجعل همجيتي عقيدة مباحة و خشونتي تحضرا ، و يمنح صلابتي دفئ أيلول
تحيطني فتملؤني غرورا .............. تملؤني فتحيطني سرورا
صدقتها و ما صلى ولا سلم عليها ملك ولا خاطبها اله ، آمنت بها و لم تبعث فينا رسولا ولا أرسلت بكتاب



تسبح في فلكي حتى حين تطالب بسذاجة- تقتلني ضحكا- بحقوق المرأة، و كأن الحق و مطلبها..... ألا تسبح في فلكي
يالغبائك ............. يالشقائك........... أعشقها رغم سذاجتها العذبة
رغما عنها أعشقها

أعشقها حين تكون خجولة، حين تحس بأن أنوثتها عيبا، و كأن أنوثتها جسدا تخفيه

أعشقها زوجة
أعشقها بنتا توقظني خوفا في الفجر من أصوات الرعد
أعشقها أختا و حبيبة أعشقها أما و صديقة، أعشقها وهما وحقيقة
أعشق كل نساء العالم
رغما عنها أعشقها

أعشق حواء حين تحصن جلستها بتعاويذ كيوبد و اساطير الرومانسية و بخور الشعر
و خرافات الحب الأبدي
أعشقها حين تفكر
وكأن الفكر يطاوعها
يالجمالك...............يالبرائة أفكارك
رغما عنها أعشقها

أعشق حواء حين تثرثر
حين تجيء بكل سخافات العالم و تثرثر

حين تغار
حين تثور
و كأن بثورتها تسمع كل العالم - كل رجال العالم - عن قدرتها، عن ثورتها، عن قسوتها حين تهاجم

رغما عني أضحك
رغما عنها أعشقها