Wednesday, July 11, 2007

الحياة كوبري كلنا هنعديه



كوبري ستانلي كان في يوم من الايام حلم حياتي

اني اكون عليه بعدالساعة 12 بالليل، وحققته، وغامرت بفوبيا الارتفاعات ،و


كل مرة اروح اسكندرية، لازم ستانلي بعد 12، ليه؟معرفش ،

ومش هاممني اعرف، عقبال الصيف دا كمان يا رب
جايلك يا طاهر هههههههههه





، مش بحب كوبري قصر النيل قوي لانه دايما البش عاملين فيه

اشغال طريق، مكربسين في حتة واحدة، واقفين طابورعلي رصيف


المشاعر عشان يلحقوا بقايا زمن متعثر، بأقل تكاليف ممكنة،
عشان كدا بتعجبني صورته القديمة من غير ناس
احسن ، مع الاعتذار للمثل اللي بيقول الجنة من غير ناس ما تنداس



لكن بالنسبة لي


أحلي لحظة بعد ما اسيب البيت، والشارع ، وكمان لما اسيب خنقة وسط


البلد ودوشتها، مع ميكروباس، تاكسي، ان شالله توك توك، المهم ياخد


الكورنيش وهوب الاقي نفسي هناك، حبة هوا مش ممكن، وكمان

قرنفل، كتير قوي وانا بعيد، كنت اقول يا ربي نفسي في شوية الهوا

اللي بشمهم اول ما اطلع علي كوبري امبابة

من ساعة ما قريت زمان رواية العطر وانا الاماكن والافراد مرتبطة بالرائحة، كوبري


امبابة دايما مرتبط عندي بريحة القرنفل، اه القرنفل ليه لا؟ عشان عشوائيات؟ عادي


احنا ف زمن العشوائيات في كل شئ، قرنفل، مع اني مش بحب القرنفل ،و


مقدرش احطه علي ضرسي لما يوجعني- زي دلوقت - بحب كوبري


امبابة الصبح، وبالليل، في الغروب، فيالشروق، بغمض عيني عن ورد


النيل، واكوام الخشب، وبقايا القمح والخيش، اللي بتحدفها


المطاحن، وعن غرز رملة بولاق.فضلت ادعبس انا


ليه بحبه كدا رغم انه كوبري عادي، لاقيت اني دايما كنت بنتبه لفيلم كمال الشيخ، المنزل


رقم 13، وبالذات العشر دقايق الاخيرة، واللي كانوا علي كوبري امبابة، كنت


اول ما اشوفه، انادي امي الحقي، الكوبري بتاعنا، كانت ترد: بتاعنا؟!و


لاقيت أني بتفشخر قوي - يمكن لان امبابة مكنش فيها حاجة ممكن


اتمنظربها - لما اكلم اصحابي عن كوبري امبابة


واقول : دا واحد من تلات اقدام كباري في مصر، كوبري


ابو العلا الله يرحمه اللي كان بيفصل الزمالك عن


بولاق ابو العلا، وقصر النيل، وكوبري امبابة، نعكشت


ف دماغي، افتكرت خروجات زمااانمع امي لسوق الفاكهة


ف روض الفرج قبل ما يبقي قصر ثقافة، كل ما امي تخرج


من البيت اشبط في ديلها، ونعدي الكوبري، كان اللي بيقلقني


دايما صوت القطراللي معدي جنبا، زلزاااااااال، نروح السوق


نجيب المانجة، والاناناس، يمكن كانهو دا المشوار الوحيد


اللي كنت بخرج فيه من امبابة، دا غير زيارة بيتجدي يوم


الجمعة، الفرق ان ف الخروجة الاولي اني كنت مبسوطة مش


مبطلةرغي في ودان امي، هو ليه الحديد الكتير


دا؟ هو ليه فوق المياه مش تحت؟هو ليه ؟ وليه؟ امي


كانت مكبرة وبتحاول تسكت فيا عشان باقي ركاب الميكروباس


غير منسجمين مع أسئلتي، أما الخروجة التانية كان بوزي


شبرين، زامةشفايفي، وخرسة طول السكة، وبسحب


ايدي من ايد اختي، اخويا، أو امي، وكلالبشر، ومرة سبتهم


واخدتها جري في الشارع عاوزة ارجع بيتنا.هو كوبري، ومش كوبري.


ببساطة مش عارفة ، هو انا لازم يبقيفي سبب عشان أحب


حاجة؟ من غير فلسفة ولا فزلكة ، كل ما اعدي من عليه


بفتكر نفسي وانا خمس، ست سنين، لابسة فستان أزرق في أبيض


بكالوش،و بيبيون و أساور فوشيا، مكنش في ضفاير، لاني


مكنتش من هواة الضفاير، بفتكر القرنفل معرفش جه منين؟، المانجة


منالسوق ، وبوابة السوق الكبيرة جدااااا، وسوبر ماركت


الونش اللي قدامالبوابة، العربيات الكارو ، والاقفاص، الشيالين،


والشيالات البنات، وعروق رقابهم تحت تلات اربع


اقفاص فاكهة، الاناناس اللي مكلتوش وحبيته علي كبر بس!!
ملحوظة:
الصورة الاولانية بتاعة ستانلي دي من تصويري

26 comments:

loumi said...

صباح الخير يا راندا
مبروك عليك اول مرجحه
جميل ان الواحد يسترجع الذكريات
بس اول مرة اخذ بالى ان الواحد ممكن يفتكر الاماكن ويربطها بريحه معينه
جميله قوى ذكرياتك
ووصفك اجمل
تحياتى

Bella said...

طول التدوينة وانا حاسة اني شامة ريحة قرنفل

بس انا بقى باحب القرنفل سواء الزهور او القرنفل نفسه وباشرب بيه الشاي

حلوة قوي الجولة على الكباري

زمان كنت احب امشي على كوبري اكتوبر وامشي مسافة طويلة جدا واحيانا اخد الكوبري رايح جاي

دلوقتي مابقاش عندي مزاج اعمل الحكاية دي من كتر الزحمة

بس جولتك خلتني اعملها معاكي

تدونية حلوة قوي قوي

والمدونة نفسها جميلة

شـــــهــــروزة said...

رغم أنى كنت بأعمل مقالب فى اصحابى على كوبرى قصر النيل ايام الكلية
ونمشى انا وهم نتفرج على حلق الله اللى لازقين عليه اتنين اتنين

الا أنى مش بأحب اى كوبرى فى الدنيا

الا كوبرى دسوق العلوى

الهوا من فوقه
تقوليش يا اوخشتى انتى فى حتة تانية برة مصر فى عز الحر؟؟؟

اية الجمال دة وريحة النيل الملطوعة فى الهوا دى؟؟
ريحة زفرة بس ترد الروح

فكرتشينى بالريحة المرتبطة بالكوبرى بتشاعى

ريحة الزفارة

صاحب البوابــة said...

ذكرياتك جميلة يا راندا

:)

تحياتي على اول مرجيحة

أحمد عبد الفتاح said...

كوبري امبابة بالنسبة لي يعني السفر
كل مرة اسافر اعدي عليه بالقطر وتووووووووووووووووووت توووووووووووووت الي اسيوط
امبابة يعني غربة
ابص لابراج الورنيش واقول حبة وجايلمك يا بنت المعز
وفعلا حبة وباجي

zenzana said...

loumi

صباح الفل يا جميلة
الله يبارك فيكي
الاماكن والاشخاص وممكن الروايات والكتب
شكرا يا فندم
اخجلتيني

zenzana said...

Bella
انا بحب كل الورود

وبحب الشارع والفرجة ع الخلق

فا هتلاقيني مجولاتية(من تجوال) هههههههه

وانا سعيد ان الرحلة عجبتك

اتمني التوك توك بتاعي يكونش ضايقك
:)
تحياتي

zenzana said...

شـــــهــــروزة
بقولك مفترية من يومك بتقاوحي

كوبري دسوق وزفارة؟
مقبولة منك عادي ما كوبري امبابة كدا بس الكوبري ف عين ناسه
اوعي وشك قرنفل هههههه
بركاتك يا دسوقي
جايلك يا طاهر
حضري المحشي والفسيخ
بما اننا مراجيح

zenzana said...

صاحب البوابة
مغسي

نورتنا
اتفضل شاي
بالقرنفل

zenzana said...

أحمد عبد الفتاح

يبقي اكيد بتتمرجح ع الكوبري كل ما تعدي
وتلاقيك بتنسي وتفضل تشاور لي من هناك
بس انا أخدت بالي
:)
يلا هتتمرجح امتي؟

tota said...

راندودة

فعلا لكل مكان عطر خاص جدا بيترسم جوانا احنا بس صورته واحنا بس نشم ريحته حتى لو مش موجوده فى الواقع لكن ده خيالنا

تدوينة رايقة بسيطة بتخلى كل واحد يروح يفكر جواه ويدور على كل مكان بيحيه وساب جواه ريحة

صباحك سكر

zenzana said...

توتا

توتا هانم الهربانة من كتب الحواديت

صباحك سكر
وعصرك كريم كراميل
ومغربك بسبوسة
انتي نورتينا يا لوزة
يا حتة سكرة
والله كفاية بس تدخلي تقولي انا جيت
هفرش ارض البلؤ رمل ومستكة
نورتينا يا فندم

:)

Gid-Do - جدو said...

زنزانة

كوبرى امبابة مرتبط بخيالى بحجات كتير جدا ـ من الدور التالت فى مدرسة محمود سامى البارودى الابتدائية بحكر ابو دومة كنت بشوف الكوبرى دون ان يحجبة عن نظرى منزل واحد فقد كانت مدرستى هى المبنى العالى الوحيد فى هذا الفراغ ياترى لسة المدرسة موجودة وقد مر على بنائها اكتر من نصف قرن

كان الدور العلوى من كوبرى امبابة للمشاة وكان المشى علية متعة ما بعدها متعة فوق الارضية المصنوعة من الخشب السميك الناعم ـ مشيت علية زمان وانا طفل مع امى ـ يرحمها الله ـ يمكن علشان نروح وراق العرب او وراق الحضرة لشراء لحمة طازجة من بقرة او جاموسة مدبوحة امام اعين الزبائن
ثم اغلق الدور العلوى بسبب اهمال الصيانة وتكسير الخشب ـ ياترى اتصلح واتفتح للناس تمشى علية ؟

كان مرور قطار الصعيد فوق كوبرى امبابة وانا بداخلة يصيبنى بالحزن فى رحلة الذهاب ـ ويملاء نفسى سعادة فى رحلة العودة ـ فى رحلتى الاخيرة للقاهرة ـ منذ عاما تقريبا ـ رايت القطار مازال يمر فوق كوبرى امبابة وكانت اعمال الصيانة والطلاء لجسد الكوبرى الحديدى على قدم وساق ـ طمنتنى ان كوبرى امبابة سوف يستمر فى اداء مهمتة لربط العاصمة بالصعيد

من تحت الكوبرى كنت اشاهد مياة النيل محملة بالطمى فى موسم الفياضان وكانت سعادتى فى لمس تلك المياة القريبة من سور الكورنيش بعد ان كانت دائمة بعيدة عنى

ياة .. زمن .. اشكرك على تذكيرى به

Gid-Do - جدو said...

زنزانة

كان لابد من كتابة تعليقين الاول عن تدونتك ـ فوق ـ والتانى اللى سبتة عن شهروزة ـ اهوه ـ

شهروزة ـ زنزانة ـ احمد ـ زياد

اة يااندال مكنتوش قادرين تعزومنى على حفل الافتتاح

على الاقل كنت اقول للبنات النصيحة الغالية

وانتم لابسين الفساتين اقلعوا الشورتات قبل ركوب المراجيح علشان لما تعلى المرجيحة محدش يشوف الوان الشورتات بتعتكم

عجبكم كدة اديكم ركبتم المراجيح وانتم لابسين الشورتات والناس حتعرف الوانها ـ اورى وشى للناس ازاى دلوقت وانتم بناتى

وياترى زياد واحمد لابسين الجينز ـ ولا هما كمان لابسين الجلاليب والطاقية الشبيكة

مبروك وحكتب الكلام دة فى كل حتة ـ تحياتى

اسكندراني اوي said...

مبروك الافتتاح
مرجيحه حلوه اوي
اوي
اوي
كلنا في حياتنا كباري لازم نعديها
وربنا يستر

صوره كوبري استانلي حلوه اوي
امال بقى لو بتقضي 13 ساعه يوميا على ارتفاع من 60 الى 75 متر كنتو عملتو ايه

بقلوكو ايه يلا نقلبها مراجيح
ههههههههههههههههههههههه
اسمحولي اضيف لينكم ليكو عندي

و القادم....أجمل said...

السلام عليكم
مبروك علي المدونة
و ان شاء الله بالتوفيق
لي عودة تاني للموضوع
بس أنا كنت عملت تصميم
بعد إذنكم طبعا
أوضح من المحطوط علي جنب
http://i8.tinypic.com/63r7fgx.jpg

أتمني إنه يعجبكم
و لي عدوة بحول الله
بس بعد مذاااااااكر
:(((

تقديري لكم جميعا

ibn nasser - ابن ناصر said...

جميل قوي كوبري استالي
بقعد من البيت اتفرج علي بالساعات

...
تحياتي

bahry said...

مبروووك عليكوا المراجيح
جميل اوي اللي انتوا عملينه ده
ربنا يوفقكم

سر كده بيني وبينك

كوبري استانلي بعد الساعة اتناشر ويا سلام لو معاكي صوت فيروز او منير
بس في يناير ويا سلام بقا اكتر لو الدنيا بتشتي

انا خايف خايف خايف
وحاسس بالخطر

تحياتي
بحري
من محافظة المراجيح
اسكندرية المستقلة

3rby said...

حلو اوي اوي اوي وسلامة ضرسك

zenzana said...

جدو حبيبي
مش عارفة أشكرك ازاي؟
بس انا مصرة لما تيجي هاخد منك حقي بﻻلين حمرا
احنا منقدرش نعمل حاجة طبعا من وراك بس حبينا نعملها لك مفاجأة
المدرسة لسه موجودة لكن حالها ﻻيصر عدو وﻻ حبيب زي باقي انحاء المنطقة
خصوصا المنطقة حوالين سور السوق
اللي كان انضف زمان اكتر من دلوقتي لما اتحول الي ﻻ مؤخذة قصر ثقافة
تحياتي
وحشتني

zenzana said...

جدو تاني
بمناسبة الشورتات
متقلقش انا قررت اتمرجح بالمايوه بما اننا ف عز يوليو والزي المناسب للمرجحة
المايوه
الله يرحمك يا شاطئ ريميني
روما البلد ف التوقيت دا من السنة
هئ هئ هئ هئ

zenzana said...

اسكندراني اووي
يا مرحب باهل بحري يا مرحب
خليت المراجيح تراوي بشوية الهوا دول
صورة كوبري ستانلي دي عمايل ايديا وحياة عنيا
الف شكر يا فندم علي اللنك
الله ﻻ يحرمنا من لنكاتك
نقلبها طبعا مراجيح احنا هنخاف
:)

zenzana said...

والقادم اجمل
اكيد ان شاء الله القادم اجمل
شكرا ع التهنئة وف انتظارك

zenzana said...

ابن ناصر
وانا اكيد بحقد عليك
خصوصا توقيت من بعد 12

zenzana said...

بحري
اهﻻ وسهﻻ باهل اسكندرية
الله عليك وعلي افكارك
ينفع معاهم ايس كريم ؟
يا ريت ..اصل محسوبتك من هواة اكل اﻻيس كريم
بس اكيد هحبه اكتر علي استانلي ف عز الشتا
هو انا بتعالج من سنانى من شوية
هههههههههه

zenzana said...

عربي
وﻻ يا عربي عملت ايه ف اﻻمتحانات
واحشني
سوري اصل مش ف المود اليومين دول
طمني ع اﻻمتحانا عبر الوسيط اوك؟
الله يسلمك دول كلهم كام ضرس عقل علي كام سنة
والدكتور نازل حفر