Sunday, July 15, 2007

بوسة مع سبق الاصرار والترصـــــــــد


قاعدة فى أمان الله لا بيا ولا عليا...مرة واحدة ضرب الموبايل ...بصيت للرقم لقيته رقم أخويا الصغير....قلت خير اللهم ما اجعله خير؟؟....دة الواد راح لخطيبته النهاردة....يكون حصل اية؟؟؟؟
بالمناسبة
خطيبة أخويا تبقا بنت خالتى بالمرة كمان
أنا : ألووو....أيوة يا ابنى مالك؟؟؟
الطرف الآخر : دة أنا يا أبلة شهرو...مش أيمن
أنا : اية يا بنتى؟؟ مالك؟؟ الواد دة زعلك ولا اية؟؟؟ وبتعطيى لية كدة؟؟؟
الطرف الآخر : الحقينى يا أبلة...ماما دااااا...وششششش..وهـء هـء هـء هـء
أنا : طيب أنا أترجم ازاى دلوقتى؟؟... يا بنتى مش فاهمة حاجة...اهدى بس واتكلمى على مهلك
الطرف الآخر : ماما يا أبلة شافتنا وأيمن بيبوسنى...وعملت مشكلة كبيرة وبتزعق لى برة وحالفة لتسيب البيت وتمشى بما أنها فشلت فى تربيتنا
أنا : هههههههههههههههههههههههههههههههه....الله يكسفكم يا بعدا....ومش عارفين تمسكوا روحكم شوية؟ ولا حسيتوا بخالتو وهى رايحة عليكم يا مقاطيع؟؟؟؟
الطرف الآخر : هىء هىء هىء هىء هىء...لاء والله دة كان فجأة...وانا اقوله يا ابنى حتجيب لى مشاكل ولا هو هنا.....نعمل اية؟؟؟الحقينى
أنا : طيب أنا مينفعش أسافر لكم دلوقتى طبعا....ادينى الفاشل اللى عندك دة
أيمن : وبصوت واااااطى ومنكسر على غير العادة تماماااا.....أيوة يا شهرو
أنا : هههههههههههههههههههههههههههه.....بطول تاريخك المهبب والمنيل بستين نيلة محدش قفشك ولا شافك.....تقوم يوم ما تكون عالصراط ورسمى تتقفش يا أهبل؟؟؟ ومن مين؟؟؟ من خالتك يا فاشل؟؟؟
أيمن : اسكتى بقا وسيبينى فى اللى أنا فيه....شكلى بقا وحش أوى أدام خالتك يا بنتى أعمل اية؟؟ دى زعلانة منى جدااااا
أنا : اطلع غلس عليها والزق فيها زى دبان الشتا...زى بالضبط ما بتعمل فى ماما لما بتصالحها...وقول لها أنك انت السبب فى الليلة دى كلها علشان مش تزعل البنية الغلبانة دى...اهو انت شحط ومش حتفرق معاك
أيمن : دى يا بنتى مش طايقة تبص فى وشى
أنا : ماهى برضة معذورة يا عبيط....ولو أن البوسة بقت موضة قديمة ومحدش بقا بيزعل منها دلوقتى....أنما نقول اية؟؟ قليل البخت يلاقى العضم فى البيتزا بقا
بعد ما قفل معايا الموبايل....جاتلى هيستيريا ضحك مفاجىء كل ما أتخيل المنظر...طلعت مسكت ودان ماما وأحكى لها اللى حصل...وهى مبرقة عينها....ويادى المصيبة عليك يا أيمن....يا فاضحنى ادام أختى يا أيمن
وبعد شوية....كل ما هى تتخيل الموقف تفطس من الضحك.....لمجرد تخيلها شكل أيمن اللى عامل هنا أسد وهو لابس فروة القطة أدام خالتو قافشاه متلبس مع سبق الاصرار والترصد
لما رجع البيت....أول ما عينى وقعت عليه مقدرتش أمسك نفسى من الضحك
ولما قعد واستريح كدة من الخضة....مسكته أقرّره....وأعرف منه الفولة وأبعاد الموقف
أنا : قوللى بقا يا ابنى يا ضنايا....هو كان بوس بس ولا بوس وتقفيش؟؟
أيمن : وهو بيبحلق لى مذبهل...طاطى راسه خجلاااا...الاتنين يا أؤختشى
أنا : لااااااء.....بسيطة....عقابها خفيف....متخافش
أيمن : تفتكرى الحالة صعبة؟؟؟....حتوصل للاعدام يعنى؟؟
أنا : لاء....حيبقا مؤبد مع الحرمان من الانفراد أو الاتصالات ألخ ألخ ألخ من كل حاجة كنت بتعملها...بسطية بسيطة
أيمن : قومى من جنبى جاتك بتاع وأنتى فقر كدة....عاملة زى البومة يا شيخة
أنا : يا ابنى أنا مفيش عندى أى مشكلة اطلاااقاااا فى أن أى حد يعمل أى حاجة...يعنى كل واحد حر....ثم يعنى خالتك محبكاها أوى.....دى خلاص البوس دة بقا اصدار قديم....بقا موضة قديمة....الاصدارات الجديدة بقا فيها حاجات تانية....هو حد دلوقتى بيتخانق على بوسة؟؟
وجــــــــاء بعدها القرار الحاسم....خالتو اتصلت بيه....وحددت القواعد والأسس الجديدة للوضع الراهن
خالتو : بص يا ابنى...بعد كدة مش حتقعدوا لوحدكم أبدااااا....يا تقعدوا معانا ووسطنا يا أما انت حر بقا
أيمن : حاضر يا خالتو...اللى تؤمرى بيه
خالتو : أنا اللى وثقت فيك تعمل معايا كدة؟؟....تقرطسنى يا أيمن؟؟
أنا : انت ياض انت مش قلتلى أنه بوس وبس؟؟ ولا أنتوا خلفتوا من ورانا؟؟
أيمن : يزقنى بعيد ويقوللى اكتمى خالص.... أقرطسك اية بس يا خالتو؟؟ قرطاس اية بس اللى حييجى على مقاسك؟؟؟
خالتو : كمان بتهزر؟؟ ماشى....وكمان مفيش اتصالات بينكم الا فى وجودى جنبها....أنا تقرطسنى يا أيمن؟؟
أيمن : حاضر يا خالتو...بس علشان خاطرى متزعليهاش...أنا اللى غلطان
خالتو : متكونش السبب يا أيمن فى أنى أخسر أختى....ومتدخلهاش فى الموضوع دة ومتقولهاش كمان
أيمن : حاضر يا خالتو....اعتبريهم معرفوش
خالتو : أعتبرهم؟؟؟؟ انت لحقت تنشر الخبر؟؟
أيمن : أبدا والله...دى بنت أختك الفاشة دى....ما صدقت انى بأستغيث بيها...مسكتتش....راحت تضّحك ماما عليا
خالتو : طيب وأبوك؟؟ عرف؟؟
أيمن : بابا؟؟.....أمممممممم....ويبص لى بيستفسر...وأنا بأطاطى براسى يعنى أيوااااان وبعدها اتصدم....لالالا طبعا يا خالتو...دة كان يدبحنى....انتى متعرفيش بيحبها أد اية وبيخاف على زعلها أد اية.....قال يعرف قال....هو احنا وش كدة؟؟؟
خالتو : طيب لما تيجى تانى انا ليا تصرف تانى معاك
خلاص...قفلوا الخط بعد العلقة المعتبرة والسلخ المتين دة.....وأنا بأهدى فيه ومش قادرة امسك لسانى من الضحك...وهو شوية يطاطى راسه فى الأرض وشوية يبحلق فى سقف الأوضة....ويفتكر الموقف من جديد ووشه يبقا ستين لون ولا قوس قزح فى عز الشتا
أنا : سبحان الله...بتيجى على أهون سبب يا ابنى....كل الفلتان اللى انت عملته برة قبل الخطوبة محدش قفشك فيه ولا عرف بيه الا أنا....ووقت ما يبقا رسمى....تتقفش من خالتك ومتلبــــــــس
أيمن : أة والله...شفتى الخيبة يختى؟؟؟؟.... أصل الخطوبات دى بتبقا أعتاب..وأنا شكل عتبتى خضرا ومحنية كمان....و انزاحى كدة بقا على جنب خلينى أشوف شغلى
ومازال الضحك مستمرا حتى الآن
ومازالت تبعات الحدث مستمرة حتى الآن على راس الاتنين
نياااااااهاااهااااااااااااا

39 comments:

اسكندراني اوي said...

هههههههههههههههههههههه
يادي الفضيحه ام جلاجل
يادي الجرسه ام حناجل
اسمحيلي اكون اول واحد يعلق على البوست
بجد بجد انا مش قادر امسك نفسي من الضحك
موقف لا يحسد عليه
والغلبانه اللي هناك دي تلاقيها ايه
مسلوخه
ربنا يعينها
ما تيلا شدو حيلكو وجوزوهم بدل ما هما متشحطططين كده
وبيتقفشو على بوسه
وش بيغمز

Bella said...

ههههههههه

ده انت شريرة جدا ياشهروزة وماصدقتي مسكتي له على ذله

هههههههههه

بس الموقف فعلا يموت من الضحك

ربنا يسعدك زي ماضحكتيني وانا بقالي كتير ماضحكتش

هههههههههههههههههههههه

tota said...

يا حرام يا ايمن
الولد اتفضح فضيحة السمكة فى طاسة القلية
بقولك ايه بما اننا كلنا بنحب نهدى النفوس ما تجيبى تليفون جوز خالتك حمى ايمن علشان نهدى نفسويته ونعرفه ان محصلش حاجة خالص بما انه ما يعرفش الموضوع
وياريت العمارة كلها لو فيها شبكة انترنت علشان هنحاول نلم الموضوع ومنزلوش غير عند مراقب مصرى و كام مدونه من الاخباريين دول اللى محدش بيقراهم

هحاول طبعا معرفش اى صحفيين فى اى جرايد اى ان كان لونها علشان احنا عندنا اخوان صبيان بنخاف عليهم برده

يا حرام يا ايمن تانى

Gid-Do - جدو said...

شهروزة

اقولى لايمن يهدى نفسة مفيش حد عرف حاجة
الجزيرة ـ والسى ـان ـان

اذاعوا الخبر النهاردة

والنيويورك تيمز حطاه عنوان فى اول صفحة

والكل بيقول ان شهروزة مصدر الخبر ومتوقعين فيديو تشرح فية شهروزة اللى حصل ـ اطمن ياايمن اختك قامت بالواجب
كدة الاخوات ولا بلاش

Anonymous said...

اسكندراني اوي

موقف؟؟
هو دة موقف يا اسكندرانى يخويا؟؟؟

دى مشرحة بعيد عن السامعين

أهو الولد بيجهز نفسه استعدادا للزواج وهانت
كلها سنتين ولا حاجة ونخلص بقااا

وش بيغمز

Anonymous said...

Bella

طبعااااااا
دة أنا سيد من يمسك مواقف وعلى أيمن

شكمنه بيطلع عينى لحد ما بيقضى لى طلب من برة
أهو كله استغلال

ربنا يجعل أيامك ضحك وفرح يا جميلة

Gid-Do - جدو said...

شهروزة

انت احسن تغيرى اسمك خلية

ابو العربى

زى هانى رامزى فى الفبلم

Anonymous said...

tota

كله الا جوز خالتو

كان زمانه عملهم بسطرمة


اطمئنى يا توتى
لسة الخبر فى اطار المراجيح بس
الموضوع مش اتصعد لسة لمجلس الأمن

انما لو نوينا وشدينا حيلنا شوية



بوش حيذيعه فى خطاب الكونجرس الجاى

نيااهااهااااا

Anonymous said...

Gid-Do - جدو

شكررااااا يا غالى على رفع المعنويات

وأحب أعرفكم أن لسة الموضوع فى طور التعتيم

والشريط اللى حيوضح كل الأحداث والملابسات والدوافع اللى ورا الحادث

دة سبق اصرار وترصد مش اى كلام


ابو العربى هراها بووووس

المسكين يا عينى ملحقش لا يهرى ولا يقطع
اتقفش من تانى مرة

zenzana said...

شهر
الصور تجنن
قولي لايمن كسفتنا تتقفش علي بوسة؟
ههههههههههههه
قولي كمان متقلقش بترجم الخبر لوكالة الانباء الايطالية
والمانيفستو كمان
وممكن مونيكا بيلوتشى تطلبه يمثل قدامها دور البطولة ف الفيلم القادم
هههههههههههه

Xee said...

هههههههههههههههههههههههههههههههههههههههههههههههههه

يعني بجد موقف لا يحسد عليه بالمرة
اتقفش و اتسيحلة جوه وبرة و برة خالص
هههههههههههههههههههه

نصائح للأخ أيمن
في حالة انكو لوحدكو في البيت
أولا: اقعدو برة في الصالون مش جوه
ثانيا: يكون مكانكو بزاوية لا تقل عن تلاتين درجة من الباب (يفضل الناحية اللي بيتفتح عليها الباب ان امكن)
ثالثا: في الزاوية المقابلة تماما لمكان وجودكم بزاية اقل من تلاتين درجةمن الباب، تحط حاجة مستفزة للي داخل، في حالة انها الام، طبق فيه بواقي منجا على تربيزة الصالون كافية جدا
رابعا: تحط اي لعبة اطفال او قلم قدام الباب بالظبط لكسب ثواني ثمينة
اخيرا: اول ما تسمع صوت الباب، تضحكو انتو الاتنين بصوت عالي بغض النظر بتعملو ايه، و تقول بصوت عالي، اه و الله زي مابقولك كده، قلتله لا يا عم انا مليش في الكلام ده، تضحكو تاني


هيييييههاااااا
:)

(وش بريئ بيغمز)

Anonymous said...

هههههههههه

يادي الفضايح

Anonymous said...

zenzana

طبعا يا بنتى لازم نلاقى صور تواكب الحدث الجلل دة

أنا طلعت عينى لحد ما لقيتهم

واد خيبة بعيد عنك يا أؤختشى
قال يتقفش ببوسة
وكل الصرمحة اللى عملها قبل ما ربنا يهديه ويخطب محدش قفشه فيها ولا مرة
بس نقول اية بقا
حظ كتاكيت

وبالنوسبة لوكالة الأنباء الايطالية
خفى ايدك شوية وترجمى بسرعة
علشان عاوزين القاعدة توسع ونوصل للوموند ديبلوماتيك

نياااهاااهااااااا

Anonymous said...

Xee

اية النصايح الغالية دى؟؟
واية يا ابنى التجارب العميـــــــــقة دى؟؟؟

فعلا
هم دول الشوباب ولا بلاااااش

وعلى رأى المثل
اسأل مجرب ولا تسألش طبيب

حأخليه يطبق النصايح دى لما يتفك حظر التجوال المفروض عليه

وروح يا شيخ
ربنا ما يحرم الشوباب الصاعد منك
وجعلك زخرا للمخاطيب الجدد


نيااهااهاااااا

Anonymous said...

Epitaph

ولسة يا ايبى
لما الخبر ينزل فى الجرايد





فى صفحة الحوادث

bahry said...

مبروك يا مرجوحة قصدي شهروزة علي المدونة الجديدة اللي قلبتيها فضايح وتجريس من أولها

الفضيحة والتسييح مش في موضوع البوسة

الفضيحة والتسييح بجد واللي ممكن يعمله مشكله في انك بين كل كلمة وكلمة تعيدي وتزيدي في تاريخه النضالي قبل الخطوبة

حرام عليكي يا شيخة

بس نصيحة للأخوة الشباب
الحاجات ديه بتجيب مغص

اه والله

مغص ومغص جامد كمان

نياااهاااااا

تحياتي
بحــري
من جوه قصر المنتزة
عند الفنار في الحته الضلمة

only spot said...

هههههههههههههههههههههههه
صحيح قليل البخت يلاقى العضم فى ال.......................
بس بجد انتى دمك خفيف جدا يا شهروزه وعندك قدره جميله على الحكى
زمان الغلبانه دلوقتى متظبطه هناك
يلا خليهم يشدو حيلهم ويتلمو بدل ما هم حتى مش عارفين يقضوها بوس
تحياتى

Anonymous said...

bahry

الله يبارك فيك

اة والله
أنت تقريبا الوحيد اللى أخدت بالك من المغزى ورا حدوتة النضال دى

الواد كان تاريخه مشرف حتى لحظتها
انهر كل التاريخ دة على حتة بوسة لا راحت ولا جات


حاجات بتجيب مغص اية يا عم الحاج؟؟
انت عاوز توقف حالنا احنا؟؟؟


أيهااا الاخوة الشوباب
محدش يسمع كلام بحرى

الحاجات دى مية فل وأربعتاشر ومنعشة للمعدة وللقنوات الهضمية
وللعمود الفقرى كمان

نيااهااهااااا

Anonymous said...

only spot

اة انا نضفت المثل شوية

بقا قليل البخت يلاقى العضم فى البيتزا

دعواتكم بقا معانا اننا نخلص لهم حالهم ويتأهلوا

وممكن أدام شوية اعمل حملة تبرعات للمساهمة فى تعجيل التأهيل
علشان منع التقفيش تانى

نيااهااهااااا

Anonymous said...

bahry


بحرى
ألا بالحق؟؟

انت فى الحتة الضلمة فى الفنار بتعمل اية؟؟؟؟

بتقفّش انت كمان؟؟؟
ولا بتقلب معدتك؟؟؟؟


نياااهاااهاااااااااا

Amyra said...

lol

انا مت من الضحك يا شهروووو

مسكين أيمن و مسكينة البنوتة... بصي على قد مضحكت على قد مصعبت علية البنوتة ... خالتو بتاعتك حتعمل عليعا حضر تجول

موقف لا يحسد عليه

بس مين ماري منيب الي في الصورة الأولى ؟؟؟

مبغوك البلوء
:)))))

أحمد عبد الفتاح said...

انا جيت
معلش العسكرية اخرتني
انا باووكد ان اخوان اون لاين شفقة بايمن قرر انه يحط الخبر شريط اخبار بس مش تحقيق

Anonymous said...

Nada

نووودة حبيبتشى
نورتى المكان

اة يا ستشى
خالتو عاملة كماشة وحظر تجول
مدعم بغطاء جوى كثيف
والمدفعية الأرضية بقذائف ارض ارض


وقال يتقفشوا ببوسة يتيمة
حاجة تنقط يا شيخة

اللى فى الصورة فوق دى
نموذج للعمل على كره الشباب للبوس مؤقتا
علشان محدش يتقفش فى موقف زى دة على الأقل اليومين دول


نيااهااهااااا

Anonymous said...

أحمد عبد الفتاح

وانا من دواخل معاميعى
بأشكر موقع اخوان اون لاين

على شفقته بالواد
وستره عليه
اللهى يستره دنيا وآخره اون لاين

خللى الخبر مجرد فونت بس من غير تحقيق

بس ابقا اكتب الفونت



باللون الأحمر

سكتم بكتم said...

ههههههههههه

مش ممكن فطست علي روحي من الضحك

بس أسمحيلي أخوكي غلطان مهما كان حبه ليها ليه يعرض زوجة المستقبل لهذا الموقف البايخ

اللي بيحب واحدة فعلا وناوي يتجوزها يخاف عليها من الهوا الطاير يخاف عليها حتي من نفسه

يارب يكون الدرس ده علمه ولو عايزين رأيي جوزوهم بأسرع مايمكن

مدونتك تحفة أرجوا أن تشرفيني بالزيارة قريبا
تحياتي

loumi said...

العزيزه غاده
أضحك الله سنك
:):):)
إيه يا بنتى ده بجد ما قدرتش امسك نفسى من الضحك
يا عينى عليك يا ايمن ياانبى وعلى اللى نابك
بس انت غلطان حد برضه يعمل كده؟
هههههههههههه
بأتخيل جوز خالتك وهو بيقرا الخبر فى شريط على قناه الجزيرة
تحياتى
بجد قولى لايمن
خالتو بكرة تنسى وترجع ريما لعادتها القديمه
بس المرة الجايه ينفذ تعليمات
الشاب المخضرم زييييييي
بس يخللى باله لان خالتو حتستعمل بعد كده وسائل متطورة للكشف المبكر عن البوس واللذى منه
ده التطور الطبيعى عند الاهل فى مثل هذه المواقف
هههههههههههه

bahry said...

الي الاخوة الشوباب بتوع المستقبل

دول طبعا غير شباب جمعية المستقبل اللي زي كبيرهم مبيعرفوش أصلا

دا نداء أخير

كتر البوس ونص الشغل
بيجيب مغص عصبي شديد
اديني حذرت وعملت اللي عليا

البوس فيه مغصون قاتل

الرفيقة والمناضلة المضللة للشوباب في ريعان شوببهم

انا في الحتة الضلمة
بافتكر ذكريات المغص وبترحم عليها

نييياااهااا

Anonymous said...

سكتم بكتم

أهلا بيك للمرة الأولى فى المراجيح

أمممممم
هو انا مش شايفة فيها لا تعريض لمواقف او بواخة او حاجة مؤذية لدرجة الهوا الطاير

كل الموضوع
ان كل الأهل عارفين اللى بيحصل بين اى اتنين مخطوبين ودة الطبيعى دلوقتى وأكيد انت فاهم كدة

لكن لما يكونوا عارفين ومش شايفين
حاجة
ولما يشوفوا بعينهم بيبقا حاجة تانية

مهما كانوا عارفين
بيبقا رد الفعل قوى جدا لما بيشوفوا اللى هم عارفين انه بيحصل اصلااااا بعيد عن عينيهم

ثم يعنى البوسة بقت حاجة محدش بيتخانق عليها
اصدار قديم يا ابنى

ربنا يسهل بس ويقويهم ونجوزهم بدل ما يتقفشوا فى اصدارات جديدة
ولو أنى مأعتقدش بعد الخضّة اللى حصلت

نياااهااهااااا

Anonymous said...

loumi

اهلااا يا جميلة
أدام الله عليكى نعمة الضحك والفرفشة

جوز خالتى ولله الحمد مش من هواة الجزيرة ولا الأخبار
هو بتاع كورة وبس
يعنى لو نزلناها فى أخبار الملاعب ممكن يشم خبرها


والله انا قلت له كدة برضة
ان الموضوع حياخد وقته ودمتم
لأن دى حاجة عادية بتحصل بين المخاطيب واللى حينكر كدة لامؤاخذة بقا يبقا بتاع
مش حأقول كداب علشان متقولوش عليا بأشتم ولا حاجة


وطبقا لنصائح العلاّمة المخضرم زيي
فانه وعليه
سيتم تطبيقها فى اقرب وقت بعد فك حظر التجوال والحصار المفروض


المرة دى خالتو حتخرم سقف الصالون وتبص عليهم من عند طنط اللى فوق

نياااهااهااااا

Anonymous said...

bahry

خوسااااااااااااية

انا فكرتك بتدور عالمغص وفرحت لك والله

يلا ملحوقة

قال مغص قال
دة قصر ديل يا.....عم الحاج

والحجة فيه مغصون قاتل
بوظوا لنا بقا الشوباب ووقفوا حالنا

نياااهااهااااااا

karakib said...

:) لذيذ

خمسة فضفضة said...
This comment has been removed by the author.
خمسة فضفضة said...

السلام عليكم ورحمة الله وبركاته

ههههههههههههه

حصل له كل ده ...يستاهل ..ههههه

المفروض كان يكتب الكتاب الاول وبعدها ما كانش حد هايقدر يقله تلت التلاته كام


يلا يعيش وياخد غيرها

تحياتي

Anonymous said...

karakib

الله يجبر بخاطرك

Anonymous said...

خمسة فضفضة

وعليكم السلام ورحمة الله وبركاته

ماهو حتى اللى كاتبين الكتاب يا بنتى بيتعمل عليهم الحظر دة
ولو حد منهم اتقفش زى حالاته كدة

برضة الأهل بيعملوا دوشة وانقلاب
دة أمر لابد منه


بس والله صعبوا عليا
لذلك قررت أنى طول ما هم قاعدين مع بعض



أشغل خالتو عالتليفون

نياااهااهاااااا

3rby said...

مش عارف اقول ايه غير انكمسخرة واخوكي ترب
في البيت
ده دماغو عالية اوي

Anonymous said...

3rby

وأنا مش عارفة اقول اية

دة مدح؟؟
ولا ذم مستتر فى صيغة مدح؟؟

ولا ذم صريح؟؟؟؟؟

Unknown said...

حرام عليكي أنتي وأخوكي
والله العظيم مت من الضحك
موتوني بجد من الضحك

بس هو يعني يستاهل اللي جراله بقا
:))))))


بس أنتي حرام عليكي هو الواد كان ناقص تقطيم يابنتي؟
والعيلة كلها تعرف
:))))))

Anonymous said...

fanan fa2eer

ماهو سيلدتك العيلة معرفتش حاجة

ودى النكتة
ان القضية لم تخرج من اطار الوالدين وأنا طبعا

بس البلوجسفير تقريبا والله أعلم
أخد خبر
ومنه الى وكالات الأنباء

نيااهااهااااا