Monday, November 26, 2007

ثاني حلقات الاعترافات .... اعترافات ف عز الضهر

الحلقة ده من الاعترافات هي حلقة برده سبق نشرها علي مدونة المتمرجحة الكبيرة زنزانة وبالحلقة ده تكون كل الاعترافات القديمة والي سبق نشرها خلصت لنبدأ من بكره نشر الاعترافات الجديدة
تابعونااااااااااااااااااااااااااااا



علي نسق اعترافات شهروزة حبيبتشي، حاولت اعترف بحبة حركات ومقالب وبلاوي ارتكبتها فافتكرت جزء، هقول منه حاجات، وهحتفظ بحاجات مش هقولها ، ولاقيت كمان ان بعض بلاويا اختفي تماما بالظبط زي المكسرات لما تغوص في الشيكولاتة ومتبانش!!

أنا اللي دبرت مقلب الازازة اللي ريحتها وحشة ف شنطة يد أبلة سلوي، لانها حلفت تسقطني في امتحان الشهر،في تانية ابتدائي، لاني فضحت بنت اختها اللي كانت عاوزة تغش مني ف الامتحان، ولزق المقلب في الواد الجتة "عماد"، فتوة الفصل ، انا حطيت الازازة ف شنطتها وفي الفسحة روحت ل "عماد" وقلت له ان ابلة سلوي اديتني شيكولاتة من شنطتها، زي العبيط راح عند شنطة الابلة، وفتحها ، لاقي الازازة فتحها، وانا زقيت دراعه وخلعت، كانت الازازة وقعت جوا الشنطة وعملت الريحة المقرفة دي، وخد حتة دين علقة، يستاهل ما هو كمان قبلها بيومين وقعني في الفسحة علي الارض، وركبي الاتنين اتعوروا، قال ايه مش عاوز بنات تلعب معاهم كرة.

أنا اللي ضحكت علي المسكين اخويا عشان يكسر الاطباق الازاز ، أمي كانت بتحبهم جدا لانهم كانوا هدية من ابويا لما كان مسافر ليبيا، انا شوفت امي بتحطهم علي النار ومش بيحصل لهم حاجة، قلت طالما النار مش عملت حاجة يبقي رزعهم ع الارض مش هيأثر، وتفاديا للضرب لو اتكسروا قلت استخدم المسكين اللي ما صدق ما لقي حاجة يلعب بيها، وكل ما يكسر طبق، اقنعه انه يمكن الباقيين ميتكسروش، وهاتك يا دشدشة.

أنا اللي حرضت المسكين الغلبان برده أخويا انه يحط الميه ف قلب التليفزيون، كنت عاوزة اعرف ايه اللي هيحصل لما احط الميه، كنت فاكرة ان الناس اللي جواه هيطلعوا برا، طبعا انفجر، واخويا اتكهرب وكمان أخد العلقة .

أنا اللي قصيت فستان فرح مامتي حبيبتي، كنت عاوزة اشوف عندي مواهب ف الخياطة زي تيتا ولا لاء؟ وكمان كنت عاوزة اقصره عشان يبقي علي أدي، لبست العملة ف بنت خالتي، اللي هي في نفس سن امي، ساعات كانت بتيجي لتيتا ،وتقيس فساتين أمي من وراها، وعليه اخترت يوم تكون هي جاية، وكشفت انا العملة ،خصوصا انها كانت معجبة بالفستان، ونفسها تاخدوا، طبعا امي كانت بتقول بعين اللي خلفوها . دا اول اعتراف بالعملة من عشرين سنة .

- أنا اللي كنت بقلد مسرحية "ريا وسكينة" و بحط كل مرة الملح علي السكر، في فنجان القهوة، بتاع ابن خالة امي ،أونكل عبد الراضي ،و بعدها معدته تقلب ، ويفضل رايح جاي من والي التواليت، كل مرة يجي فيها م الصعيد، لانه دايما كان يدي اخويا عيدية اكتر مني قال ايه عشان هو الولد، وكمان بيحرض امي ان بقيت طولها، وميصحش العب ف الشارع، مع ان كان عندي سبع سنين، وكل مرة بعد ما يمشي اتحبس واخد علقة لو حبيت العب ف الشارع.

- أنا اللي بعت هدية لاستاذ الفيزياء ف أولي ثانوي، عبارة عن ببرونة أطفال، وجواها ورقة بتقول "علي أد سنك"، طبعا الورقة مكنتش بخطي انا، كانت بخط اغلس بنت ف الفصل، وكانت حدفتني بالورقة ف الحصة، كنت مزقططة جدا وغلست عليها ، لما جه الاستاذ تاني يوم وهزئها قدام الفصل كله علي عملتها الهباب.

أنا اللي كنت السبب في حرق شعر بنت خالتي في فرح أختي، من تسع سنين، كنت انا وعبير صحبة اختي ماسكين الشمع، اتكعبلت مش عارفة ف ايه؟ (وش بيغمز) ، شمعتي جات علي ايد عبير اللي شمعتها مالت علي راس بنت خالتي ، فاتحرق شعرها، بعدها الاتنين اتخانقوا وقاطعوا بعض، بصراحة بنت خالتي تستاهل، كانت بتتنك وبتتمنظر بدون داعي.

- أنا اللي ناديت علي أبلة وفاء مدرسة التاريخ في تالتة ثانوي، عشان تشوف سمية صحبتي ورا باب الفصل كانت بتعمل حواجب بنت صحبتها بالخيط، اتحولوا لمكتب الست الناظرة، اللهم ما احفظنا،
تستاهلي يا سمية ، حاولت كتير اقولها بلاش ف الفصل ممكن التواليت.


أنا اللي دمرت عشرين شريط كاسيت بصوت أم كلثوم ، لبابا أول ما رجع م السفر، لان وقتها مكنتش بحبها خالص، وهو واجع دماغي باغانيها الطويلة علي مدار 24 ساعة، فسجلت عليهم حلقات مسلسل " الشهد والدموع " و "ماكجيفر" ، وجزء منهم كنت بقلب البكرتين عكس بعض، وأول ما هو يحط الشريط في الكاسيت يتشد ويتقطع ، لزقت في أختي لانها الوحيدة اللي عبرت له عن عدم حبها للست ام كلثوم، وأمنيتها انه يرحمها م الشرايط دي.


اعترف اني انا اللي فيرست اللاب توب بتاعه مش صديقته الانتيخ ، كل مرة كنت اروح أسافر أقضي اجازة هناك، كانت بتحب تيجي البيت من باب الغلاسة، وف المرة دي اتصلت عاوزة تيجي عشان تستعمل الانترنت، وكمان كانت عاوزة تستعمل اللاب توب بتاعه، مش الكمبيوتر العادي لانه بطيء، أنا كمان اتصلت بصديقي الانتيخ، انه يبعت لي لنك لاي فيروس، وفعلا اول ما هي جات تستعمل الجهاز كان الفيروس انتشر، وشل الجهاز ، ودي كانت أخر مرة أشوف خلقتها ف البيت، خصوصا ان الجهاز خد كام يوم لحد ما اتصلح، تستاهل لانها عارفة أني مش كنت بحب استعمل اللاب توب احتراما لخصوصية حاجاته كمان كنا رايحين السنيما .

اعترف كمان أني أنا اللي دبرت وخططت لكسر سي دي بتاع لعبة "الحضارة"، مش بحب الجيمز، وكنت بتغاظ لما كان قاعد قدامي بيكلمني وماسك اللاب توب وهاتك يا لعب، وفشلت محاولات اقناعي باني اتعلم اللعبة، ونلعبها سوا، ولاني درست خطواته كويس في البيت، حطيت السي دي جنب رجل ترابيزة المطبخ، وهو زي كل مرة، جه حرك الترابيزة جامد، ورفعها، وحط اللاب توب عشان يلعب ، وهوب السي دي لوحده كان تحت رجل الترابيزة، وديشششششش، لزقتها فيه هو لانه دايما كان سايب حاجاته مبعترة ف الشقة من غير نظام..

أخر حاجة لسه طازة امبارح بس، حطيت رجلي قدامه وهو بيعدي، وقع اتكوم وهو نازل من عربية المترو، غلس عليا، وغتت، وكمان البادي سبراي بتاعه كان يقرف، كبرت دماغي اني ازعق له، قلت الطيب أحسن، اللهم لا شماته

16 comments:

RealMan said...

حسبي الله ونعم الوكيل
انتوا بنأدمين عاديين زينا كده يعني ولا انا وقعت في حاره العفاريت.

اللهم احفظنا. طيب يا فالحه لو وانتي كده حاطا رجلك قدامه اتكعبل ووقع تحت المترو يا تري هيبقي اول قتيل ولا العدد في الليمون ولا ايه النظام.

ومن غير سلامو عليكو.

Anonymous said...

هههههههههههههههههههه

كل مرة اقرا اعترفاتنا اقع من الضحك اننا جات لنا الجرأة صحيح نبعبر عنها كدة

خخخخخخخخخخخخخخخخ

حتى ريال مان اعتبرنا مش بنى آدمين
هههههههههههههههههههههه

والله كانت ايام جميلة يا ريال صدقنى
مش عارفين نعيدها تانى

RealMan said...

تعيدي ايه بلاش الله يكرمك فين الوقار
خلي الكلام ده للاطفال بقي بلاش احراج
احنا عواجيز حاليا يا فندم. يعني لازم نرسم الدور شويه ولا ايه يا بنتيت.

هههههههههه حلوه بنتيت ده. بس مش عارف مش ماشيا معاكم خالص علي فكره

Anonymous said...

لا دي مش اعترافات

دي مصايب كنتي بتعمليها في اللي حواليكي

لكن بجد في منتهى الروعة وتسلم الأيادي على كده

بس ادعي ربنا انه مش يرد فيكي المقالب دي بعد كده

دمت بخير

zenzana said...

RealMan

جري ايه يا حاج متصلي ع اللي هيشفع فينا وفيك مالك شادد اوي حيلك علينا؟
ولا دا تأثير ما بعد الثلاثين؟
:)

متقلقش متعودة علي وقوع جرحي وضحايا اثناء المعركة يعني ولا هيبقي اول قتيل ولا هيبقي العدد ف الليمون
وسلامو عليكم

zenzana said...

شـــــهــــروزة

it was so coll days, but Now is coller, ha3ha33
:)

zenzana said...

RealMan

حلوة جدا يا كابتن
فكها، العمر مش بيتحسب بالسنين بيتحسب بالانجازات في الحياة أو لحظات السعادة اللي بتقدر تخطفها ، يعني ولا تستني لما تجيلك، او ان حد يشحتها لك

لا تمشي معانا اوي خالص جدا بس اللي ميعرفش مسموح له يقول عدس
:)

zenzana said...

صاحب المضيفة

شالله يخليك، بس انا مكنتش بعمل حاجة هم اللي كان عندهم استعداد ههههههه
لا ما ظنش انى ممكن يتعمل فيا كدا مع اني اللي يشوفني بيتخم فيا
ههههههههه

الحمد لله said...

اعتقد ناقصلك قرنين وشوكة وديل وتبقى شيطانة صغننة... على قدك يعنى

ذو النون المصري said...

الهنا ما اعدلك
مليك كل من ملك
............
لبيك قد لبيت لك
لبيك ان الحمد لك
............
و الملك لا شريك لك
ما خاب عبد سالك
...................
انت له حيث سلك
لولاك يارب هلك
..................
لبيك ان الحمد لك
و الملك لا شريك لك
.....................
كل نبي و ملك
و كل من اهل لك
...................
و كل عبد سالك
سبح او لبي فلك
................
لبيك ان الحمد لك
و الملك لا شريك لك
...................
و الليل لما ان حلك
و السابحات في الفلك
.................
علي مجاري المنسلك
لبيك ان الحمد لك
.........................
و الملك لا شريك لك
يا خاطئا ما اغفلك
....................
اعمل و بادر اجلك
و اختم بخير عملك
...............
لبيك ان الحمد لك
و الملك لا شريك لك
....................
هذه القصيده لشاعر الخمريات الشهير ابو نواس، احببت ان اهديها لكم بمناسبة وقفة عرفات و عيد لاضحي المبارك، كل عام انتم بخير ،تقبل الله منا و منكم طيب القول و صالح العمل
.........................

moatassem bellah said...

هلا يا مراجيح... ازيك؟؟ انا معتصم بالله صاحب مدونة "عروبتي" التي تتحدث و تضيف و تناقش كل ما يهم المواطن العربي و ما يهم مصالحه و احلامه, ادعوك لتشرفني بزيارة مدونتي و مشاركتي بأرائك

العنوان التالي:

www.moatassembellah.blogspot.com

اهو ده عيبه said...

مش ممكن كمية الاعترافات والبلاوى دى
مش ناقص غير تعترفى انك السبب فى احداث 11/9 وانك فجرتى البرجين

وبالمرة اعترفى انك السبب فى الغلا وانخفاض مستوى الزمالك
واهو ينوبك ثواب

Anonymous said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the TV de LCD, I hope you enjoy. The address is http://tv-lcd.blogspot.com. A hug.

Ahmed Al-Sabbagh said...

هههههههههههه

ومش عارفة ايه اللى كعبلك

لا بجد فظيعة اوى

تحياتى

احمد

أحلى حياة said...

هي دي اعترافات مين بالضبط؟؟؟!!!!!!!
عم أحمد عبد الفتاح ولا واحده بنت .. انا حاسه ان دماغي لفت :S

أحلى حياة said...

اهاااااااااااااااااااا
دي مدونة مشتركة .. سوري ماختش بالي :D