Saturday, November 24, 2007

الحلقة الاولي من الاعترفات .... اعترافات ليلية


بما ان هذه الحلقة من الاعترافات قد نشرت قبل ذلك في مدونة شهروزه
الا اننا راينا اعادة النشر لسببين
الاول ان مراجيح تبقي مكان يلم كل الاعترافات المنشور منها والجديد
والسبب التاني الاعترافات ده ليها جزء تاني مش هينفع يتقري الا لما تقرا دول الاول
وعلي فكره احنا بنرحب باي اعترافات لاي حد من اي حتة ننشرها له
وكله في سبيل عموم فائدة الاعترافات
أبعت لنا اعترافاتك علي
ahmedikhwan@gmail.com
أسيبكم مع بلاوي المتمرجح الاول... شهروزة



أقر وأعترف
بأنى كائن كئيب محب للعزلة ولا أهوى التجمعات البشرية الكبيرة ، حيث تشعرنى بالعدائية بداخلى نحو أى حد يفقد عقله ويحك لى فى مناخيري
....................................
أقر وأعترف أنى مخلوق قابل للتعلم كل يوم ، وبأى وسيلة ، ومن اى حد أقتنع بوجهة نظره وأنى مخلوق ذو طبيعة واحدة ، يا أما أبيض أو أسود ، مفيش كاروهات ولا حسب الظروف
.....................................
أقر وأعترف أنى فى مواقف بايخة راسى بتبقا أنشف من أقدم فردة شوز على وجة البسيطة...ومحدش يسألنى اية هى المواقف دى
......................................
أقر وأعترف أنى عصبية و غلسة وسئيلة وخنيّقة فى أغلب الأوقات ومحدش بيستحملنى والحمد لله ، لكن كله من باب الواجب
......................................
أقر وأعترف أن الرخامة والغلاسة على الناس طبع أسود ومهبب فيا ومش قادرة اتخلى عنه خصوصا على المقربين منى جدا...مالوش علاج عند حد الطبع المهبب دة؟؟
......................................
أقر وأعترف أنى أنا اللى حرقت طرف بلوزة ماما من عشرين سنة وأنا بألعب بشعلة البوتوجاز ودبستها فى أخويا الصغير وهو اللى أخد العلقة بدالى
....................................
أقر وأعترف انى أنا اللى كسرت ازازة الكولونيا بتاعت بابا اللى بيرش منها بعد ما بيحلق اللى ريحتها كانت بتخنق ماى ماذر لما تهفهف فى البيت من عشرين سنة ...ولزقتها برضة فى أخويا الصغير وهو اللى أكل العلقة بدالى
...................................
أقر وأعترف أنى انا اللى كنت بأكتب الواجب لأخويا وهو فى المدرسة وهو يخرج ويصيع براحته لما كبرنا شوية تعويضا منى على العلقات اللى اتسحلها بدالى...وطبعا مازال هذا السر مدفون للحظة قرائته الآن
........................................
أقر وأعترف انى ولا مرة عجبنى طبيخ ماما ، رغم روعته ، أد ما عجبنى أكل جدتى اللى هى والدتها...لكن طبعا مقدرش اقول كدة
.......................................
أقر وأعترف أنى أنا اللى دشدشت شاشة التليفزيون بمفتاح الأنبوبة وأنا باهزر مع أخويا وتقلنا فى الهزار شويتين بما أنه كان لسة موصلش يبقا طول أكتافى...وكسرت رجل النيش اللى هو محطوط عليه علشان الحادثة تظهر قضاء وقدر
وطبعا رجل النيش المخوّخة بفعل فاعل هى اللى شالت الجريمة كلها
......................................
أقر و أعترف أنى أنا اللى دلقت شفشأ المية من البلكونة على عم محمد الله يرحمه بتاع الفول وهو معدى تحت بلكونتنا وأنا صغيرة أوى...كنت عاوزة الحمار بتاعه ينهق وهو مش راضى ينهق... فى اليوم دة بس لما نهق فهمت انه كان مزكوم
.....................................
أقر وأعترف أنى عمرى ما حبيت حد من عماتى أو أعمامى أو أولادهم... لأنهم شبهى فى الشكل...حاجة تخنق لو مشيت مع حد منهم الناس تقول أخويا او اختى...مفيش تغيير؟؟...وأعتقد أن الشعور متبادل....ولا انا اللى بيتهيأ لى؟؟
................................
أقر وأعترف أنى أنا اللى رميت شالية الورد البلدى من البلكونة على راس أم رضا جارتنا اللى أدامنا يوم ما زعقت لى وانا بأسقى الزرع فى البلكونة والشوالى مقورة من تحت ودلقت المية علي راسها...وبعدها بنص ساعة نزلت روحت امتحان الرياضيات بتاع تالتة اعدادى بعد ما ثبتت التهمة على القطة اللى معدية من على سور البلكونة...حد كان قالها تبلط تحت البلكونة وقت ما بأسقى الزرع وهى عارفة أن دة الوقت بتاع الزرع الصبح بدرى ؟؟...أمتثثثثثثم...حكم
...................................
أقر وأعترف أنى حطيت ملح وجبنة بيضا فى فنجان الشاى وأنا بأقدمه لخالى لما جة يزورنا...زعق لأخويا قبلها بيوم وضربه جوز أقلام... علشان قال اية؟؟؟؟
طير له جوزين حمام من الغيّة بتاعته بتلات آلاف جنية
افتكره شاى بلبن وزاح الفنجان مرة واحدة...وعينك ماتشوف الا النور...من يومها له تسعتاشر سنة مش بيبص فى وشى أنا وأخويا والحمد لله
................................
أقر وأعترف أنى رميت نص الخمسة كيلو سمك اللى بابا جابهم معاه من ايتاى البارود...وكدبت عليه وقلت له انه كان بايظ ومش طازة...المقص وجع لى ايدى فى التنضيف...قلت الرحمة حلوة وكفاية عليهم اتنين كيلو...رميت نص كيلو للقطط على باب البيت...والباقى...عمل بعثة لحد أم صابرين على أول الشارع وقلت لها أنه هدية من ماما
...................................

أقر واعترف انى أنا اللى كسرت رقبة الديك الرومى بتاع الفرارجى اللى على ناصية شارعنا...فى حالة دفاع شرعى عن النفس طبعاااااا
نط لى من فوق التقفيصة...وجرى ورايا تقولش بينى وبينه تار ولا أكلت حد من عيلته قبل كدة؟؟؟
ومحدش قدر يعكشه
دخلت أول شارع جانبى و بأول بلاطة كعبلتنى شيلتها وطاااخ فى وشه
فانكسرت رقبته قضاءا" وقدر وانتقل للرفيق الأعلى
لكن بعد ما ابن الهايشة قرمنى من سمّانة رجلى
وطبعا قلت ان البلاطة وقعت من العمارة اللى احنا تحتها...دة واجب عليا طبعا
هاااااة بقا... ذكريات الثالثة عشر ربيعا
......................................
أقر وأعترف أنى أنا اللى خليت شعر بنت عمتى الكبيرة ولا حريق القاهرة ايام الملك فاروق
ماهو انا مكنتش اعرف ان الازازة اللى ورا باب المطبخ فيها مية نار
افتكرتها خل... وأخدته ودلقته عالحنة
صوابعها بقت كفتة...وشعرها بقا...لك أن تتخيل... وقتها رميت البلوة على ابن ابن عمى البغل التانى...اة ابوة ابن عمى بحكم اننا اصغر اطفال فى العيلة وقتها ويعنى انا فى مقام عمته الأهبل دة...كنت بأكرهه عمى علشان كل ما يشوف فى ايدى شندوشت جبنة رومى من اللى بحبها ييجى يخطفه من ايدى ويفتحه يلهف الجبنة الرومى ويرمى لى العيش ويجرى يومها كان حلال عليه اللى حصل له
...............................
أقر وأعترف أنى أنا اللى سربت قطط جدتى الله يرحمها والدة بابا...كنت بأغير منهم أنها بتحبهم أوى...رغم انها كانت بتحبنى جدا جداااا علشان احنا اصغر احفادها...كانوا تلات قطط شيرازى عجب...بس اعمل اية؟؟...الغيرة وحشة بقا يا اخواتشى
اديتهم للعيال زمايلى فى الدرس وانا فى سنة سادسة ابتدائى حلوة وملو العين كدة
............................

أقر وأعترف أنى أنا اللى بلغت الشرطة فى استاذ على جارنا...سلم عليا فى الشارع وأنا راجعة من المدرسة والشنطة على ضهرى هدت حيلى بطريقة سخيفة زيه كدة...وهات يا احضان وطبطبات وانا مبحبش حد يقرب منى أو يحط طرف ايده عليا نوهاااااااائى
قااال اية؟؟ انا بنته التانية ...قال اية بيعدينى
المهم اديته اللى فيه النصيب وهددته انى حابلغ عنه الشرطة قعد يضحك شكمنى عيّلة صغيرة ومحدش حياخد على كلامى...مناخيرى نقحت عليا وجريت على القسم ومن عالباب هات يا عياط....يا شاويش راجل فى شارعنا كان حيخطفنى...ومسكنى وهات يا بوس وأحضان فيا وانا ماعرفوش بس هو ساكن فى اول الشارع...وعنها والشاويش الله يكرمه جة فى رجلى وشاورت له على استاذ على...ماعرفش جاب الأستاذية دى منين لكن باسمع كل الناس تقوله كدة...الوالد اعتذر للشاويش على الازعاج ومفيش حاجة واحنا جيران والذى منه....و مسك هو و اعمامى استاذ علي رقعه علقة متينة
من يومها لو شافنى معدية من يمين الشارع يدخل هو جرى فى الحيطة اللى فى يسار الشارع
................................

أقر وأعترف أنى كنت السبب فى اعتزال مدرس العلوم فى المدرسة الاعدادية لحياة التدريس واتجاهه الى التجارة فى الأدوات المنزلية... وقت ما كنت مسئولة عن الاذاعة المدرسية وتشغيل الطابور وفى يوم اشراف العلوم...مسك المايكروفون وهات يا تهديد ووعيد لكل من لن تلتزم بآداب اليوم بتاعهم...وشوشت صاحبتى اللى جنبى وقلت لها...المفروض اننا نكافح وجود الاستاذ فلان فى المدرسة بأن كل واحدة مننا تشيل مخرطة ملوخية فى جيبها...فى اللحظة دى كان بيدينى المايك أكمل تشغيل الطابور والاذاعة المدرسية
وعنها وأمة لا اله الا الله سمعتنى...حتسألوا اشمعنا مخرطة وهو اتحمق ليه والمدرسة باللى فيها سخسخت ضحك ليه
اصله كان اسمه الأستاذ فلان ملوخية
أنا كمان من يومها اعتزلت الحياة الاذاعية
يلا بقا...ربنا يسامحنى
..............................
أقر وأعترف انى انا اللى بوظت الملايات و الستاير البيضا بتاعت طنط اللى فوقينا وهى متنشرة فى البلكونة بحقنة مليانة ميكروكروم وجنتيانا زرقا...حكم بيتنا عقبال عندكم مبيخلاش من الحقن وادوية الكحة والأنفلونزا الخ الخ...وهات يا رش عالغسيل الأبيض
واحدة ناشرة ملايات سرير وستاير مغطية البلكونة بتاعتنا...تقولشى خشبة مسرح؟؟لا عارفة ابص عالناس فى الشارع ولا عارفة اتابع حركة سير المرور
لكن الحمد لله .... مبقتش تنشرهم بالطريقة دى تانى...بعد ما التهمة لبست فى الست اللى تحتينا...ودلوقتى أول اعتراف ليا بالحادث
................................

أقر و أعترف أنى كنت بأنط فى منور البيت وانا واخواتى لوحدنا فى البيت والباقى فى الشغل واحنا أطفال...وأطلع عالحيط والطوب الأحمر بارز منها...مجرد هواية...كان احساس حلو لما بأحس انى زى السحلية ماشية عالحيطة...وطقت فكرة مجنوة منيلة بستين نيلة فى راسى... رميت عود كبريت والع وانا تحت لمجرد اتفرج على الورق وهو بيولع ادامى...سقف المطبخ اللى تحتنا ولع...ولكن الحمد لله...لم يسفر الحادث عن وقوع ضحايا
اللهم الا قطتين كانوا نايمين ورا الكراكيب وانا مش شفتهم...و خراطيم المية اتفتحت من الشباك اللى فوقينا و أنقذت ما يمكن انقاذ
.................................
وسبحان الهادى من غير مناسبة...وقار ثانوية عامة بقا ومن وقتها...عقبال أولادكم
.................................
أمضى وأوقع ادناه
غادة شهروزة
ختم الشعار
قرص مدور وجواة حداية

8 comments:

شـــــهــــروزة said...

خخخخخخخخخخخخخ
يا ابنى انا اتجرست واللى كان كان

بس والنبى عشان التجريسة هنا تبقا مركزة شوية
صغر الخط شوية يا ابوحميد
احسن عامل أدامى زى الكنافة المشحكلة

حأكمل الجزء التانى
وربنا يستر بقا
استخبوا ورا المتريس

نيااهااهااااا

شـــــهــــروزة said...

والصووووورة ياد يا أحمد
نزلها دى كانت أهم جزء فى الاعترافات

zenzana said...

هههههههههههههههههه
هو لسه في جزء تاني؟
لا انا مش هقدر اعمل جزء تاني

انا حكيت الحواديت اللي شهودها مش هيقروها
اقولكم هحاول
:)
اقولكم سر احنا العشر تلاف لسه عاملة حركة ف ابويا ممكن يطردني فيها م البيت خخخخخخخخخخخخ

RealMan said...

بتهرجي
انتي عملتي كل المصايب ده وانتي لسا في اعداديه. ده احنا كنا ملايكه بقي والواحد مش واخد باله.

اقر واعترف ان انا انسان مؤدب جدا جدا وزياده عن اللزوم كمان.

البنت ناقص انها تقول في ثانويه عامه عندها 2 جرحا و 30 جرحا

الرحمه من عندك يا رب

شـــــهــــروزة said...

RealMan

ههههههههههههههه
هههههههههههههههههه

طب والله من غير تهريج
ثم دى كانت أفعال طبيعية جدا فى نظرى وقتها والله
وباعملها بكل براءة و راحة ضمير كدة
مكنتش اتخيل انها كدة


فى ثانوية عامة مأفتكرش حتى انى قلت لحد سامو عليكو
كنت عايشة دور سميرة موسى ومصفى مشرفة
هى دى مرحلة استقرارى

هههههههههههههه
مش حتعترف انت كمان؟؟؟

(وش بيغمز)

RealMan said...

مقلتيش لحد سلامو عليكو ممكن اصدقها لكن انك تقول انك معملتيش في حد مقالب من بتاعتك ده معتقدش ولا ممكن ابدا اصدقك بيقولوا في المثل ايه " يموت الزمار وصباعه بيلعب " عايزا تقنعيني انك تحولتي بقدرت قادر الي البنت اللطيفه الوديعه طيب ازاي ومنين تيجي البراءه . قولي كلام يدخل الدماغ يا ستو هانم.

اعترف اعترف علي ايه ولا ايه يا بنتي انا لو اعترفت ممكن ادخل السجن ومؤبد كمان بلاش تجيبلنا مصيبه علي اخر الزمن خلي المستور مستور يا تفيده.

هههههههههه

اسكندراني اوي said...

الله يكون في عوووووونك يا ادم يا خويا

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول