Sunday, October 28, 2007

لو كنت روش طحن..يبقي أنت أكيد فيس بوكاوي


لو كنت روش طحن..يبقي أنت أكيد فيس بوكاوي
ولو معرفة الناس كنوز يبقي أنت في المغارة

زمان اللي هو مش بعيد قوي يعني، كان عشان تبقي روش طحن يبقي كان لازم تشيل موبيل، ومع التطور الطبيعي للحاجة الساقعة عشان تبقي روش طحن جدا يبقي لازم تبقي شايل البلوج بتاعك في جيبك، اما دلوقتي بعد التصاعد المستمر للتطور الطبيعي لكل حاجة،و عشان تبقي روش طحن جدا جدا يبقي لازم تبقي فيس بوكاوي، يعني تبقي من ضمن الكام مليون المشتركين علي الفيس بوك (المصنف الحالي كأكبر شبكة اجتماعية علي النت)، اللي اول ما يفتحوا الكمبيوتر، سواء ف البيت قبل غسيل وشهم، او في الشغل قبل ما يستعينوا ع الشقا بالله.
الموقع مش محتاج عبقرية نتوية ولا افتكاسات، لان الافتكاسات كلها موجودة، يعني مزيكا، رسم جرافيتي، هدايا، فيديوهات، نكت، وتهييس كمان، يعني ولا محتاج توجع قلبك وتصمم بلوج، وتدعي العبقرية الفذة في الكتابة والنضال، كل ما عليك، أن يكون عندك
Email address

وتعمل به Account

أو أن لو ليك اصحاب غتتين زي بعض اصحابي هتلاقي عشر تلاف دعوة جاية لك ومش هيسيبوك الا لما يطلعوا عين اهلك الا لما تقبل الدعوة وبعدها غصب عن عينك

هتبقي فيس بوكاوي، اسهل من شكة الكلاشينكوف ، ودا عالم واسع، بس متقلقش كله بكليك واحدة او كلكتين، ولو مش عاوز تتعب نفسك كل اللي يجيلك من اصحابك ابعته لهم تاني!! محدش واخد باله.
لو كنت من هواة التعرف ع المزز من الجنسين، مش محتاج لف ودوران، ولا تربيطات ع الشات، او حتي انك تظبط لك بلوج ، ولا الدخول في مباريات التعليقات والاخد والرد علي المدونات، لحد ما تتعرف، وبعدين تبقي صديق من خلال الايميلات، وبعدين ترتقي العلاقة وتقابل المزة علي أرض الواقع، وبعدها ربنا يسلك لك طريقك، لالالا كلا والف كلا ، أنت تدخل كمشترك محترم لك شنة ورنة، زي ابونا الحاج تمام ،واتفرج علي البومات الصور، ونقي واختار وقارن براحتك، محدش هيقولك تلت الخمسة كام، واي حد يخش الطاسة تعمله أدد في الليستة بتاعتك وعيش يا حاج /مان/مزة.


مش معني كدة أن الموقع خنقة، أو هايف والعياذ بالله، هو بس بعد شوية هتلاقي ان كل الحاجات اللي بتجيلك من اصحابك جات لك قبل كدا عشر تلاف مرة، أو كل الافتكاسات اللي انت بعتها لاصحابك هي هي اللي بتوصلك منهم، وان كل من هب ودب بيعملك ركوست عشان تبقي صديق ، بس برده هتقدر تلاقي اصحابك بتوع زمان، وتصرخ كدا وتقول ياااه مسير الحي يتسفلت، أصحابك اللي كانوا معاك في كي جي وان، واحتمال قبلها لما الست مامتك كانت بتابع حملها فيك عند الدكتور!! أو الواد ابو بربور في اولي ابتدائي، ولا البت اللي كانت بتزنقك في الضلمة بالازهر بارك، عشان تاكل منك السندوتش، بس اياك تحس ان كل من هب ودب بيعمل لك أدد تافه وهايف و عامل قاضي بما انه فاضي، كلا البتة هو كمان مشغول لكن بيحب يسلي نفسه وهو مشغول برده بمعرفة ناس جديدة، وزي ما قالوا ف مدغشقر معرفة الناس كنوز.
كمان بصة سريعة منك علي بروفيلز اصحابك هتقدر تعرف مين بيظبط مين؟ ومين مخاصم مين؟ لكن عشان محدش يعرف عنك حاجة ابقي اعمل هيد لكل حركاتك من علي البروفيل بتاعك خخخخخ
كمان هتقدر تزوغ من رئيسك أو زمايلك في الشغل بما أنك هتبقي فاتح صفحتك علي الفيس بوك، ضمن الصفحات الكتير الخاصة بالشغل-اذا كنت فعلا بتشتغل- ومحدش هياخد باله، وهتقدر تبعت رسايل سريعة لاصحابك، أو تشات، وتبعت لهم ورد، وشيكولاتة، وكل انواع الهدايا، وممكن كمان تدخل معاهم في ووتر فايت وكل دا وانت مقرطس الجميع، ومحدش واخد باله.

بس خلي بالك يا كابتن لو المدير بتاعك او حد من زمايلك بيعمل نفس عملتك ، او لو عاوز تنفض لحد رزل ولا مزة مش ولابد، يبقي ظبط نفسك وخليك اوف لاين، اللي عاوز يعرف ازاي؟

يبعت لي كام كيلو شيكولاتة، وانا هقوله علي جنب ، احسن تفتكروني بسيح و العياذ بالله
بس لو لك صاحب غتيتت غاوي يبعت لك عشر تلاف دعوة لجروبات ، ولا خمشعشرتلافف دعوة ، الافضل تعمله روموووف، ولو سألك قوله بعمل حملة نضافة للليستة، ونسيت ودلته غلط، ، واياك تفتح اللولب توظ بتاعك قدامه بكل رخامة هيقولك لو سمحت اعمل لي ادد دلوقتي .

بس فعلا أحلي حاجة لما بتكون غزالتك رايقة، وتدخل ترسم جرافيتي، اذا كنت من هواة الفنون، خصوصا الرسم. نصيحة ارسم لنفسك لان محدش هيعبرك م الفيس بوكاوية اللي انت تعرفهم
ولو أنت بقي فلحوس واذكي اخواتك، ونتاوي جامد طحن ،ممكن تبقي صاحب جروب معتبر، وممكن تسميه اي حاجة وتهييس براحتك، محدش هياخد علي كلامك، ولا حد هيتهمك بالردة، ولا يلبسك قضية ازدراء أديان، وللمرة العشرتلاف هتقرا الفاتحة للي اخترع الفيس بوك، زي ما بتقراها للمرسي ابو العباس.

11 comments:

اسكندراني اوي said...

ياااه يا زنزانه
عاش من شافك
اخبارك ايه
......
طب دا سؤال برضه واضح انك على الفيس بوووووك

حلوه المرجيحه مفيده وخفيفه

Anonymous said...

بماأنى فى أجازة والله أعلم لإمتا ومش بأتابع حاجة
لكن انتى عارفة انى من آخر لقاء بيننا مستنية المولود دة على ناااااار

ههههههههههههه
تحفة يخرب بيت سنينك
والله وصفتيه بالتفتوفة

وكله كوم والإخوة الغتتة بتوع الريكوستات ومن غير سابق معرفة
أعوذبالله الحفيظ

ولا لو واحد رزل مصمم انك تقبلى ريكوسته وانتى حذفاه اشاسا
ولااااااازم يضيفك فى الليستة بتاعته لمجرد المنظرة ادام اللى بيستكشف الفريندس


بصراحة؟
هو بتاع خنقة خنقة الصراحة
مش عارفة فعلا اية الهدف منه
ماهو اصحابنا موجودين فعلا فى ياهو وهوتميل وعالموبايلات
يبقا اية؟؟

توسيع دايرة المعرفة أكتر؟؟
طيب
والسخسيات السايكو اللى موجودة فيه
اية المحاذير منها بقا؟؟؟

والله لولا بيوصلنى منه على الجيميل رسايل مكنتش فتحته ولا بصيت فيه


عموما
هو محتاج حذر شديد فى التعامل معاه
شديد اية؟؟؟؟؟؟؟

أكثر درجات الحذر كمان فى قبول الاضافات او الكلام مع اى حد

دة شارع يا امى مفتوح ومنفد على بعضه

وحشانى جداااا

BaTresYa said...

على فكره انا مكنتش من مشجعين الفيس بوك بس ناو بقيت مدمناه ودا تبعا بسبب اصحابي اللي مش غتته ...بوست زي العسل

Anonymous said...

Oi, achei seu blog pelo google está bem interessante gostei desse post. Gostaria de falar sobre o CresceNet. O CresceNet é um provedor de internet discada que remunera seus usuários pelo tempo conectado. Exatamente isso que você leu, estão pagando para você conectar. O provedor paga 20 centavos por hora de conexão discada com ligação local para mais de 2100 cidades do Brasil. O CresceNet tem um acelerador de conexão, que deixa sua conexão até 10 vezes mais rápida. Quem utiliza banda larga pode lucrar também, basta se cadastrar no CresceNet e quando for dormir conectar por discada, é possível pagar a ADSL só com o dinheiro da discada. Nos horários de minuto único o gasto com telefone é mínimo e a remuneração do CresceNet generosa. Se você quiser linkar o Cresce.Net(www.provedorcrescenet.com) no seu blog eu ficaria agradecido, até mais e sucesso. (If he will be possible add the CresceNet(www.provedorcrescenet.com) in your blogroll I thankful, bye friend).

Ahmed Al-Sabbagh said...

جميل اوى

بس الفيس بوك ده بصراحة خنقة اوى

انا مش عارف البنات بقت جريئة اوى كدة ازاى


ربنا يستر


تحياتى ليك على المقال الرائع
احمد الصباغ

Anonymous said...

بصراحه و بكل وضوح انا لسه مش عارف الفيس بوك بيتعمل ازاي و نفسي اجربه
ياريت تكتبي عن كيفية عمله
.............
ذو النون المصري

zenzana said...

اسكندراني جدا جدا

انت يا استاذ لك وحشة
مستخبي فين؟

zenzana said...

شهروزتي

تكرم يا زوق

انتي تأمري يا قطة ههههههه

اه اصحابنا موجودين بس احنا زي القرع نمد لبره ونموت ف الافتكاسات
تفضلي متلقحة قدامهم ع الماسنجر لكن قال ايه مايحلاش الكلام الا ع الفيس كوخ
الموضة يااوختشي

لا يا ختي مش شارع مفتوح ولا نيلة لان كل الطوب والاسمنت ف ايدك ابني وعلي ف خلقة اللي ميعجبكيش
مفيش حاجة بالعافية
وانتي ايضا
سي يو تومورو

zenzana said...

BaTresYa
مغسي يا فندم
هنيئا لكي سرعان ما هتزهقي
ولو مزهقتيش اعملي لي أد
:)

zenzana said...

Ahmed Al-Sabbagh

شكرا يا فندم نورت المراجيح

يعني هي جات ع البنات؟
ولا وقعوا من قفا القلة؟
صلي ع اللي هيشفع فيا وفيك
:)

zenzana said...

ذو النون يا روحي
هبعت لك دعوة
من عونيا فديك الساعة اللي تدخل برجلك اليمين ع الفيس كوخ

بس خلي بالك كله ترع ومنحنيات
:)
تحياتي يا عثل